Giklaro ni Board Member Nicandro Suaybaguio, Jr. nga dili siya babag sa paghatag og ayuda, basta kini mahatag sa tamang tao. Gitumbok niini ang mga katawhang nagpait sa panginabuhi nga angayang tabangan sa gobyerno, mga dili kanunay mokita sama sa mga driver sa motorsiklo o kaha biktima sa bisan unsang matang sa kalamidad. Ingon niya, ang maayong pagdumala sa ayuda importante aron masiguro nga ang angayan nga mga benepisyaryo ang makadawat.
“Ang giingon sa balaud nga ang angay makadawat og ayuda kana ganing naglisud. Kung dili ka magtrabaho karong adlaw, wala pud kay mauli sa imong pamilya… Ingon ko dili man ko babag sa ayuda,” matud ni Suaybaguio atol sa panagtigom sa Barangay Pagsabangan, Tagum City, Pebrero 12, 2025.
Ang mga programa nga iyang gipasabot mao ang Ayuda para sa Kapos ang Kita (AKAP), Tulong Panghanapbuhay sa Ating Disadvantaged/Displaced Workers (TUPAD), Assistance to Individuals in Crisis Situation (AICS), ug Emergency Cash Transfer (ECT).
Sa samang higayon, duyog ni Suaybaguio si Governor Edwin I. Jubahib sa pag-apod-apod og tag-tulo ka kilo nga bugas matag pamilya sa siyam ka mga purok sa Barangay Pagsabangan isip kabahin sa Handog Pasasalamat Program ni Kuya Gov.
Susamang distribusyon gihimo usab sa Canocotan ug Apokon sa Tagum City, diin gitinguha sa gobernador nga magpadayon ang mga maayong serbisyo aron masiguro nga walay bisan kinsang mabiyaan, ug ang tanan makadawat.
Kauban sa gobernador sa maong kalihokan ang mga konsehal sa LGU-Tagum, opisyales sa barangay, ug ang iyang anak nga si Clarice Jubahib.
Writer: Lorna TripoliPhotographer: Andrew John Hababag
