Opisyal nang gilusad ang jingle nga "Pulis DavNor Inyong Kauban" isip pagpalig-on sa pakig-uban sa kapulisan ug katawhan sa probinsya.

Gipatukar kini niadtong Hulyo 7, 2025 sa Davao del Norte Provincial Police Office (DNPPO) sa National Highway, Tagum City,atol sa ika-30 nga selebrasyon sa Police Community Relations Month.

Ang magsoong pulis nga sila si FO3 Rodney Fuerzas ug PCpl Ruel Fuerzas maoy mitingog sa jingle, nga hinugpong nga kontribusyon sa mga miyembro sa PNP.

Gipasidunggan ni PNP Provincial Director PCol Alexander Serrano Jr. ang duha ka pulis pinaagi sa pagtunol og plaque isip pag-ila sa ilang talento.Gihatagan usab og mga sertipiko sa pagpasalamat ang mga media partners sama sa Provincial Information, Communication, and Knowledge Management Office (PICKMO), DXNR 91.1 FM, PTV DavNor 48, XFM, ug Juander Radio tungod sa ilang suporta sa paghatud og tukmang balita ug impormasyon.

Matod ni PMaj Anjanette Tirador sa DNPPO, ang maong kampanya usa ka panawagan sa katawhan nga makigpartner sa mga kapulisan sa pagmintinar sa kahapsay ug kalinaw sa probinsya.

“Dako kaayo mi og kadasig nga mohangyo sa atong community nga makigpartner sa atoang kapulisan para sa pag-maintain sa atoang kahapsay ug kalinaw sa tibuok probinsya sa Davao del Norte,” matod ni Tirador.

Gisulti usab ni Tirador nga ilang gipatuman ang 3-minute response time gikan sa pagpahibalo kanila sa panahon nga adunay emerhensiya. Gisiguro niya nga ang mga pulis DavNor masaligan sa mga katawhan.

“Ang ginasunod gyud mostly is the 3-minute nga response time. In fact, sa pagmonitor namo daghan nang nakadawat og premyo sa atong chief PNP mismo gikan tungod sa pag-follow sa atoang mga police stations within Davao del Norte for the implementation of this 3-minute or 5-minute response time,” dugang niya.

Ang Pulis DavNor Jingle kabahin sa palapdan nilang kampanya nga pakiglambigit sa komunidad alang sa mas paspas nga pagsulbad sa krimen.

Writer: Lorna Tripoli