Malipayong gidawat ni Governor Edwin “Kuya Gov” Jubahib ang 18 ka mga miyembro sa rebeldeng New People’s Army (NPA) nga mibalik sa sabakan sa balaud, uban sa paningkamot sa kasundalohan sa 60th Infantry Battalion.
Ang mga misurender nga sagad nag-operate sa kasikbit nga probinsya sa Agusan del Sur mitubag sa pag-aghat kanila sa kaniadto ilang lider ug kauban nga si kanhi Guerilla Front 3 Secretary Maximo Catarata, alyas Datu Makatindog, nga una nang misurender kang Kuya Gov niadtong Abril 2022.
Sulti ni Kuya Gov nga usa ka dakong oportunidad alang kaniya ang padayong pagdawat sa mga mosurender bisan gikan sa ubang probinsya, sa iyang dakong suporta sa kampanya sa gobyerno batok insurhensiya.
“Bisan tinuod ang atong kaigsoonang FRs taga laing probinsya misurender sa atoa, gihatag ni nga dakong opportunity nga atong dawaton… Posible nga kung ato ning pasagdan magpadayon sila sa paglihok sa kabukiran ug pwede sila motabok sa atong boundaries. So, magkaproblema gihapon ta,” ingon sa gobernador.
Makadawat dayon og ₱10,000 nga cash assistance ug livelihood assistance ang mga former rebels gikan sa probinsya, samtang gina-process pa ang ilang mga hinabang gikan sa Enhanced Comprehensive Local Integration Program (E-CLIP) sa gobyerno.
Kahinumdoman nga sa tanan-tanan, anaa na sa 5,000 ka mga rebeldeng NPA ug mga miyembro sa Militia ng Bayan ang misurender kang Kuya Gov, sugod pa niadtong wala pa siya milingkod isip gobernador.
Sulti ni Alyas Jess nga ang wala matuman nga mga saad sa NPA ug ang kagutom, inubanan sa ilang nakita nga maayong pagtagad sa gobyerno sa ilang mga kauban nga nauna nang misurender maoy nakapaaghat kanila nga moampo na pud sa gobyerno.
“Pag-aghat sa amo ni Datu Makatindog, miingon siya nga maayo na ang gobyerno, ug nakita nako ang (mga army sa) 60th IB buotan man. Mao to naaghat ko nga mobalik sa gobyerno,” ingon siya.
Butyag usab ni Datu Makatindog nga kay Kuya Gov siya misurender ug sa iyaha gihapon niya ginadala ang mga kanhi kauban nga iyang makumbinsi nga moampo na tungod kay nabati niya nga mas luwas siya ug ang iyang mga kauban sa Davao del Norte.
“Una, nakabalo ko sa iyang (Kuya Gov) performance. Kumpiyansa pud ko para safe akong kinabuhi mao nga siya gyud akong giduolan… Matinabangon siya sa mga tawo… Maayo ang pag-atiman sa amoa,” sulti niya.
Dugang butyag sa kanhi kumander nga padayon pa siya sa pagpasilitar sa pagnaog sa ubay-ubay pa nga iyang mga kanhing kauban nga gusto na sab mosurender sa gobyerno.
Writer: Noel Baguio
