Naabot na sa munisipyo sa New Corella ang dugay nang gikahinamang mga serbisyo sa Oplan KKK (Kaagapay sa Kalinaw ug Kalamboan), nga dalit ni Governor Edwin “Kuya Gov” Jubahib para sa katawhan.

Ang Oplan KKK usa ka programa nga gimugna sa Probinsyal nga Panggamhanan sa Davao del Norte, diin klase-klaseng libreng serbisyo ang gitanyag sa nagkadaiyang opisina sa kapitolyo. Kahinumdoman nga gipahinabo na ang unang hugna niini sa Siyudad sa Tagum niadtong Hulyo 2024.

Lima ka barangay sa New Corella ang unang gibisita sa Oplan KKK, nga mao ang Brgy. Poblacion, Brgy. Carcor, Brgy. New Bohol, Brgy. San Jose, ug Brgy. New Cortez. Malipayon nga gidawat sa mga residente ug barangay officials ang pagbisita sa PLGU-DavNor sa ilang lugar. Dako usab ang ilang kalipay tungod sa ilang mga naangkon nga serbisyo ug kaalam gikan sa maong katikaran.

Ang Oplan KKK usa lamang sa mga proyekto ni Kuya Gov nga nagtumong sa pagpaduol sa mga serbisyo nga dalit sa gobyerno sa mga hilit nga lugar. Magpadayon gihapon og suroy ang PLGU sa uban pang mga barangay sa New Corella sa mga mosunod nga adlaw.

Writer: Hannah Zafra