Human siya nagpasalamat sa bag-ong mandato nga iyang nadawat, mipasalig si Governor Edwin “Kuya Gov” Jubahib nga iyang tupngan ang dakong pagsalig sa katawhan kaniya pinaagi sa maayong pagdumala ug paghatud sa dekalidad nga mga serbisyo.
“Atong i-deliver ang tanang mga promises nga gihulat sa katawhan… Dili ni nako sayangon ang inyong pagsalig kanako. Kining tanan akong tumbasan og mainit nga serbisyo para sa tagsa-tagsa ka pamilya sa probinsya sa Davao del Norte,” sulti sa gobernador, human sa proklamasyon sa mga mananaog nga mga local officials, Martes sa gabie, Mayo 13, 2025.
Gibutyag sa Provincial Board of Canvassers (PBC) nga nakaangkon og 323,396 ka boto si Kuya Gov sa miaging piniliay, aron motiwas sa iyang ika-tulo nga termino pagka-gobernador, sugod Hulyo 1, 2025.
Dayag ang kalipay sa gobernador nga gituman sa katawhan ang iyang hangyo aron hatagan og saktong ka-tandem sa Sangguniang Panlalawigan nga mosuporta gayud sa iyang mga programa, sanglit midaog pagka-bise gobernadora ang iyang kamaguwangang anak nga si Clarice “Clang-Clang” Jubahib.
Si Clarice ang mahimong pinakabata ug ika-duhang babaye nga vice governor sa lalawigan.
Malaumon kaayo ang gobernador nga ang dakong suporta ni Clang-Clang, kauban sa mga board members ug sa katawhan maoy modala sa Davao del Norte aron mamahimong usa sa mga nag-unang probinsiya sa nasud.
“Ang atong ambisyon for Davao del Norte nga mahimo kita nga premier Province in the country. So, paningkamutan nato with the support sa atong Sangguniang Panlalawigan, sa atong Vice Governor (-elect) Clarice “Clang-Clang” Jubahib, ug Board Members… mga department heads ug tanang empleyado sa Kapitolyo ug tanang mga elected officials,” ingon ni Kuya Gov.
Kauban nga giproklama sa PBC sila 1st District Representative-elect Jose Manuel Lagdameo, ug District 1 Board Members-elect Lou Suaybaguio, Prospero Estabillo, Jr., Tristan Royce Aala, Jane Ang, ug Ronald Eliot, ug District 2 Board Members-elect Atty. Janris Jay Relampagos, Flopone Royle Catalan, Al David Uy, Orly Amit, Atty. ug Wendel Enad.
Mitambong sab sa maong proklamasyon si Special Assistant to the President Antonio Lagdameo, Jr., agi’g pagpakita’g suporta sa iyang igsoon nga midaog pagka-congressman sa Distrito Dos.
Writer: Noel Baguio
