Malampuson nga gisaulog sa Bahay Pag-asa ang ika-10 nga founding anniversary niini niadtong Agosto 30, 2024 sa New Corella, Davao del Norte. Ang kalihokan gipangunahan ni Provincial Social Welfare and Development Officer Rosalinda O. Rapista, RSW, MPA, nga mipadayag sa iyang pasalamat ug paghatag og bili sa mga ahensya sa gobyerno ug mga stakeholders nga padayong nisuporta sa maong pasilidad.
Matud ni Rapista, ang Bahay Pag-asa dunay dakong papel sa pagtabang sa mga kabatan-onang nahisupak sa balaud, ug gipanghimatuod niya ang panginahanglan sa padayong suporta alang sa pagbag-o sa ilang kinabuhi.
“Bahay Pag-asa is now on the 1st decade, so ten years po in service. So, I would like to extend our heartfelt gratitude sa among mga partners for being there for 10 years. Partners nato from the Judiciary, partners from PNP and men in uniform, and of course, ang DepEd, ang atong mga LSWDO’s we have gone this far. So, without you dili gyud ni namo mahimo. And of course, ang suporta sa atong Kuya Gov ng Masa Kuya Gov Edwin I. Jubahib,” ingon ni Rapista.
Sa mensahe nga gibasa ni Executive Assistant Jemuel Melmida, gipadayag ni Governor Edwin "Kuya Gov" Jubahib ang iyang pagpasalamat sa tanan nga nagtrabaho aron mapadayon ang operasyon sa Bahay Pag-asa. Gidayeg sab niya ang pagkab-ot sa pasilidad sa level 3 accreditation award, nga nagpakita sa ilang paningkamot ug pagdedikar alang sa mga kabatan-onan.
“Over the past decade this institution has been the beacon of hope and transformation. And today we gather not only to celebrate its anniversary but to recognize the remarkable achievement, the receipt of the level 3 accreditation award as a center of excellence. This accreditation is not just a title it is a testament to the hard work, dedication and unwavering commitment of everyone involved in Bahay Pag-asa,” sulti ni Melmida.
Gisaysay usab ni "Alyas James," usa ka residente sa Bahay Pag-asa, ang iyang kasinatian samtang anaa sa sulod sa maong pasilidad. Gipasalamatan niya ang tanan nga nagtabang sa iyang pagbag-o, ilabi na si Kuya Gov tungod sa oportunidad nga gihatag kaniya.
“Life nako sauna way back wala pako nasulod sa center, high school pako ato medyo bugoy-bugoy gyud ko. Napabarkada sa dili dapat mabarkada. Wala pa bitaw kabalo kung unsa ang tama og mali… By the way, violation nako RA 9165... Life nako dinhi sa sulod sa center kuya, lisud siya,.. Pirmero lisud kay layo sa pamilya… Diri sa center, diri ko naka-learn og knowledge sa akong self, naka-learn kung unsay tama og mali. Diria na-develop akoang self, akoang mind. Diria ko na-aware nga dili gyud ko mo-stay sa akong past life,” matud ni Alyas James.
Atol sa selebrasyon, gihatagan og pasidungog ang mga ahensya sa gobyerno ug mga pribadong indibiduwal nga dunay dakong kontribusyon sa padayong operasyon sa Bahay Pag-asa.
Ang 10th Founding Anniversary usa ka paghinumdom sa mga kalampusan ug sa padayon nga paningkamot sa tanan nga nakig-uban aron mapalambo ang mga kinabuhi sa mga kabatan-onan sa probinsya.
Writer: Nestor Mata, Jr.
