Gidagsa sa liboan ka mga residente ang pagsugod sa programa ni Governor Edwin "Kuya Gov" Jubahib nga Oplan KKK kon Kaagapay sa Kalinaw ug Kalamboan serbisyo caravan sa Bingcungan, Tagum City.
Gipahimuslan sa mga lumulopyo sa mga barangay sa Bingcungan, Madaum, San Isidro, Libuganon, ug Busaon ang pag-ulan sa daghang mga serbisyo, sa padayong pagpaduol sa mga programa sa kapitolyo ngadto sa katawhan.
Gihatagan og gibug-aton ni Kuya Gov nga ang Oplan KKK nagtumong sa pagtubag sa sosyo-ekonomikanhong panginahanglan sa katawhan ug kini dili usa ka pamulitika.
"Dili ni pamulitika pero isip among pagtuman sa among katungdanan... Obligasyon nako nga serbisyohan ang katawhan nga walay pili-pili," sulti ni Kuya Gov.
Lakip sa mga dalit sa Oplan Serbisyo sa Kalinaw ang mga libreng tambal, medical, dental, social, legal ug agriculture and veterinary services, eye care screening, HIV screening, X-ray, gupit, livelihood training, pagpanghatag og bugas, tsinelas, mga abono ug semilya sa mga gulay ug prutas, purga ug multivitamins alang sa mga kahayopan, ug daghan pa.
Gitapos ni Kuya Gov ang programa pinaagi sa usa ka pulong-pulong kauban ang mga opisyales sa lima ka mga barangay, diin gipahayag nila ang mga problema nga nagkinahanglan og hinanaling pagtagad.
Gipaniguro ni Kuya Gov nga iyang hatagan og dayong solusyon ang problema sa mga barangay.
Apil niini ang paghimo sa mga dagkong canal aron masulbad ang mga pagbaha, paghatag sa rasyon sa tubig-mainom sa mga residente, pagtukod sa sea wall, shelter assistance, paghatag panginabuhian sa mga mangisdaay ug mga apektado sa kalamidad, ug pipila ka mga imprastraktura.
Gipasabot sa goberndor nga ang programang Oplan KKK kini usa ka revised version sa Oplan Tabang, nga gisugdan sa gobernador niadtong tuig 2019, kung asa gihatud sa kapitolyo ang mga nag-unang serbisyo sa mga lagyo ug hilit nga kabarangayan.
Ang Oplan Tabang (Tabang sa Barangay Alang sa Nanginahanglan ug Galisud) usa ka bahin sa local peace initiative ug nakatabang aron mawala ang insurhensiya sa probinsya. #
Writer: Noel P. Baguio
