Kapin sa 100 ka kababayen-an, kadaghanan mga empleyado sa kapitolyo, ang nitambong sa Women’s Health Advocacy Forum nga gipahigayon niadtong Abril 4, 2025 sa DavNor Gym, Sports and Tourism Complex, Mankilam. Ang forum maoy panapos nga kalihokan sa selebrasyon sa Women's Month, ubos sa temang “Ang Kahimsog sa Kababayen-an, Kahimsog sa Katilingban.”

Ang maong aktibidad kabahin sa padayon nga paningkamot sa provincial government ubos sa liderato ni Governor Edwin I. Jubahib sa pagpalambo sa kahimsog ug kahimtang sa kababayen-an ug kabatan-onan sa probinsya.

Gipangulohan kini sa mga eksperto sa medisina nga nituki sa dagkong isyu sa reproductive health, sama sa menopause awareness, breast ug cervical cancer, family planning, pap smear, ug maayong pag-atiman sa pagmabdos. Ilang gipasabot ang mga kababayen-an sa importansya sa ehersisyo, sustansyadong pagkaon, ug regular check-up aron malikayan ang komplikasyon sa panglawas.

Si Dr. Khristine Rosemarie Sabido ang nipasiugda sa open forum, uban nila Dr. Emilie Ugdang, Dr. Maria Lourdes Cabling, ug mga ob-gyne gikan sa Davao Regional Medical Center (DRMC), Mindanao Center for Reproductive Medicine, ug Tagum Global Fertility Clinic. Ang mga partisipante nakapahimulos usab sa libre nga konsultasyon, nga gisuportahan sa Fertility Care Center Davao Inc., Ecovag, ug uban pang mga stakeholders.

Matud ni Dr. Alfredo Lacerona, Provincial Health Officer, talagsa ra kaayo ang ing-ani nga oportunidad, diin makahatag og tukmang impormasyon gikan sa mga eksperto sa rehiyon. “Gusto lang gyud namo nga mahatag sa inyoha ang mga expert, mga impormasyon, ug angay buhaton alang sa inyong kahimsog,” iyang giingon samtang mipasalamat sa mga partner organizations sa ilang suporta.

Sa samang adlaw, usa usab ka panagtigom alang sa mga estudyante ang gihimo sa DavNor Coliseum. Nagtutok kini sa pag-edukar sa kabatan-onan kabahin sa personal nga disiplina, sexual responsibility, ug kampanya batok sa teenage pregnancy ug Violence Against Women and Children (VAWC).

Writer: Lorna Tripoli