Alegre ang mga nag-unang kadalanan sa Siyudad sa Tagum atol sa mainitong pagsaulog sa Chinese New Year sa China Town, Pioneer Street, nga maoy sentro sa talagsaong kalihokan nga nagpasundayag sa mabulukon ug mahinungdanong kultura sa mga Filipino-Chinese.

Buntag pa lang nabati na ang kasikas sa kadalanan nga naghatag og kinabuhi sa Pioneer Street. Ang mga pagsaba gikan sa naglagubong mga drums nga maoy ritmo sa Lion ug Dragon Dance, Chinese Yoyo Dance, ug uban pang performances nga gidalit sa Davao Chong Hua High School ug Tagum City National High School - SPFL Chinese Mandarin Students. Suot nila ang mga masanag nga costume nga pula ug yellow—mga kolor nga nagsimbolo sa kaisug, kusog, ug kalipay.

Bisan pa sa pagbunok sa ulan pasado alas-6 sa kagabhion, wala kini nakababag sa tradisyonal nga pag-abog sa mga dautang elemento pinaagi sa colorful fireworks display. Gipahayag niini ang kalangitan nga naghatag kalipay sa mga Tagumeños ingon man sa mga turista.

Gipangandaman usab sa Lokal nga Panggamhanan sa Tagum ang seguridad ug trapiko aron hapsay ang kalihokan. Gisirad-an ang dalan sa Pioneer Street aron malikayan ang kalit nga pagsulod sa trapiko ug masiguro nga malingaw ang tanan.

Samtang nagpadayon ang selebrasyon, usa usab sa mga highlight ang Chinese New Year Food Bazaar nga gi-display daplin sa kalsada. Dinhi, ang mga Tagumeños ug mga turista nakatilaw sa mga tradisyonal nga pagkaon nga simbolo sa swerte ug kaabunda, sama sa tikoy ug oranges. Kini nga mga pagkaon nagpasabot sa pagdaug sa mga pagsulay ug pagtikang sa kalamboan alang sa tuig 2025.

Writer: Lorna Tripoli