Gatosan ka mga zumba enthusiast gikan sa nagkalain-laing dapit sa rehiyon ang nipartisipar sa gipahigayong Jungle Fever Zumba dance party sa VJR Auditorium, National Highway, Tagum City, niadtong Nobyembre 16, 2024.
Gitambongan kini sa mga mahiligon sa zumba gikan sa Siyudad sa Tagum, Siyudad sa Davao, Banay-banay, Davao Oriental, Cagayan de Oro City, Davao de Oro, ug uban pa.
Highlight sa kalihokan ang espesyal nga partisipasyon ni International Zumba Education Specialist (ZES) David Velez gikan sa Colombia ug ni ZES Daniel Napoleon Bacus nga taga-Tagum City. Ang duha ka Zumba experts naghatag og makapadasig ug makalingaw nga mga dance moves, nga nihagit sa mga partisipante nga ihatag ang ilang pinakamaayong mahimo sa dance floor.
Sumala ni ZIN Lou Ramirez, ang organizer sa maong kalihokan, nga gihimo kini aron pagpahinumdom sa kadaghanan sa tinuod nga zumba gumikan sa kadaghang mga fitness dance classes nga nitumaw nga gitawag og zumba apan dili gyud tinuod nga Zumba. Dugang niya nga gihimo ang aktibidad aron pagpakita sa kamahinungdanon sa ehersisyo nga makahatag kalipay ug kahimsog sa panglawas.
“Kani mo-serve siya as a reminder kung unsa gyud ang true essence of Zumba, kung unsa gyud tong true form of Zumba. Kay usahay man gud nalimtan kung unsa man tong tinud-anay nga Zumba… Ang second, goals of course – remind everyone to stay healthy, fit to go sa healthy lifestyle na road,” ingon ni ZIN Ramirez.
Nanghinaut si ZIN Ramirez nga nag-enjoy ang tanang niduyog sa maong Zumba party ug magpadayon sa ilang fitness journey para mamentinar ang ilang healthy lifestyle. Nanawagan kini sa tanang naghunahuna nga mo-join sa Zumba sa pagbisita sa mga Zumba class nga nahimutang dinhi sa Siyudad sa Tagum aron masugdan na ang ilang healthy lifestyle.
“So, akong gina-invite everyone to join our classes. Daghan ta’g classes dinhi sa Tagum kay daghan ma’g Zumba instructor dinhi. So, daghan sa facebook page kung gusto mo makabalo kung asa dapit maka-join og classes. Makita lang ninyo na. Dili dapat maulaw kay kuan man gud ni, friendship through dancing. So, ginaawhag nako ang tanan to join us,” dugang niya.
Ang mga partisipante nipaambit sa ilang kalipay sa maong Zumba experience, diin ila usab kini giisip nga usa ka paagi sa pag-promote sa maayong panglawas ug healthy lifestyle.
Ang kalihokan nagpakita dili lang sa talagsaong talento sa mga Zumba instructor apan sa maayong panaghiusa ug panagkuyog sa komunidad pinaagi sa ritmo sa musika.
Writer: Nestor Mata, Jr.
