Gitigom niadtong Mayo 13-14, 2025, ang mga section ug division heads sa Kapitolyo sa Davao del Norte sa ikaduhang hugna sa learning session nga nagpunting sa pagpalig-on sa liderato ug pagpauswag sa kaepektibo sa serbisyo publiko. Ang maong kalihokan gipahigayon sa VIP Clubhouse sa Davao del Norte Sports and Tourism Complex, ubos sa pagdumala sa Provincial Human Resource Management Office (PHRMO) uban sa suporta sa Civil Service Commission (CSC) Region XI.

Ang tinguha sa training mao ang paglig-on sa leadership competencies sa mga supervisor ilawom sa Provincial Governor’s Office ug uban pang departamento, isip kabahin sa paningkamot sa administrasyon ni Gobernador Edwin I. Jubahib nga palambuon ang kapasidad sa mga kawani sa gobyerno.

Gipasabot ni CSC Region XI Director Ruby Española nga ang lima ka leadership competencies nga giila sa probinsya mao ang gigamit nga basehan sa dugang kwalipikasyon para sa mga supervisory positions. Ingon niya nga ang pagkaandam sa mga lider sa kabag-ohan ug ang ilang abilidad sa pagdani ug pagpalambo sa ilang mga tawo mahinungdanon sa malungtaron ug episyenteng serbisyo.

Matud ni Española, ang kausaban dili lamang angay ipatuman sa sistema, apan kinahanglan usab nga dawaton ug sabton sa matag empleyado. Gamit ang interactive nga mga aktibidad, gipalalom sa CSC ang papel sa personal ug institusyonal nga transformation.

“Human na man ang election, so magpadayon ta sa pagserbisyo sa katawhan. Ang tinuod gyud nga pagsilbihan, ang atong mga kliyente,” matud pa ni Española, nga misulti usab nga dili dako ang kausaban nga ipatuman sa probinsya sanglit daog ang kasamtangang gobernador sa bag-ohay lang nga National and Local Elections 2025.

Ang maong kalihokan kabahin sa padayon nga inisyatiba sa probinsya aron mapaayo ang paghatud sa serbisyo publiko pinaagi sa pagpalig-on sa liderato ug kapasidad sa tanang kawani sa gobyerno.

Writer: Lorna Tripoli