Hugtanong giduso ni Governor Edwin "Kuya Gov" Jubahib ang usa ka resolusyon nga nagmando sa tanang men in uniform sa paglusad og monitoring ug imbestigasyon sa tanang mga warehouse sa probinsya nga posibleng gihimong POGO Hub. Giduso kini sa Provincial Peace and Order Council nga naglangkob sa Davao del Norte Provincial Police Office, DILG, AFP, NBI, PDEA, BFP, ug uban pang ahensya sa gobyerno. Ang resolusyon nagtumong sa pagpakgang sa operasyon sa bisan unsang ilegal nga POGO Hub sa probinsya.
Gidayeg ni Kuya Gov ang mga kapulisan ug NBI tungod sa ilang malampusong operasyon batok sa ilegal nga Philippine Offshore Gaming Operator (POGO) sa Panabo City niadtong bulan sa Disyembre, 2024. Naaresto ang mga suspetsado nga naglangkob sa 55 ka mga Chinese, 3 ka mga Malaysians, ug 1 ka Filipina, base sa taho sa NBI.
Samtang sulti sa gobernador nga bisan sa kakulang sa confidential fund sa probinsya nagmalampuson pa gihapon ang mga awtoridad sa pagsanta batok kriminalidad. Gawas sa POGO Hub gitaho sa pulis DavNor ang ubay-ubay nila nga nadakpan nga mga suspek sa nagkadaiyang salaod lakip na niini ang ilegal nga droga.
"Wala nihunong ug ang tanan nagpadayon sa pagtrabaho, ug for this year mi-come-up 'ta og good report para sa atoang accomplishment and implementation of various programs regarding public safety and peace and order sa atoang province. Gani, na-maintain nato even almost zero ang atoang confidential funds, na-maintain nato nga ang atoang province is nagpadayon nga insurgency-free province," sulti sa gobernador.
Samtang, sa nasampit nga miting, gipaabot ang mga updates gikan sa mga miyembro sa PPOC bahin sa kalihokan sa mga kasamtangang programa nga gipatuman aron mapalambo ang seguridad sa probinsya. Gituki usab ang mga plano alang sa tuig 2025, nga naglakip sa dugang pondo ug proyekto aron masuportahan ang pagpadayon sa kampanya batok sa kriminalidad, droga, ug ang pagpadayon sa pagka-insurgency free sa Davao del Norte.
Gitambongan sab sa mga department heads sa kapitolyo sa pagpanguna ni Provincial Administrator Atty. Ralph Dela Cruz ang naasoy'ng 4th Quarter Meeting sa Provincial Peace and Order Council (PPOC) nga gipahigayon niadtong Disyembre 19, 2024, sa VIP Clubhouse, DNSTC Mankilam, Tagum City.
Writer: Lorna Tripoli
