Gisugdan na sa Davao del Norte Learning Institute (DNLI), uban sa pakig-alayon sa Davao del Norte State College (DNSC), ang pakighinabi sa mga aplikante alang sa enrolment sa school year 2025-2026. Gipahigayon kini niadtong Marso 5-7 sa Bulwagan ng Karunungan, Provincial Government Center, Capitol, Tagum City. Ang mga rekomendadong aplikante ipailawom sa mas hugot nga beripikasyon sa ilang mga dokumento ug ipasa sa DNSC karong Marso 17-18.
Sumala ni DNLI Supervising Administrative Officer Samuelle Marionne Sanchez, nagpadayon ang pagpalapad sa mga akademikong programa sa DNLI. Sugod sa academic year 2025-2026, ang institusyon motanyag na’g upat ka undergraduate programs: Bachelor in Public Administration, Bachelor of Science in Disaster Resiliency and Management (BSDRM), Bachelor of Science in Entrepreneurship, ug ang bag-ong kurso, Bachelor of Science in Tourism Management (BSTM).
Ang programa naglakip sa mga empleyado sa gobyerno nga buot mopadayon og eskwela o mopauswag sa laing edukasyon alang sa dugang kahibalo ug kasinatian.
“We offer now two more masters programs aside from the Master in Information Technology. Naa tay Master of Arts in Educational Management and the much-awaited Master in Public Affairs.” matud ni Sanchez. “Nakita nato ang trend nga nagkadaghan ang mga empleyado sa gobyerno nga gustong makaeskwela og masteral.”
Gikatakda ang DNSC-DNLI College Entrance Exam karong Abril 5 ug 12, samtang ipagula ang mga resulta sa Mayo 5-9. Ang DNLI, nga hugtanong gisuportahan sa Provincial Government of Davao del Norte ubos sa administrasyon ni Governor Edwin I. Jubahib, nagpadayon sa pagpalig-on sa edukasyon alang sa mga Dabaonon pinaagi sa mga specialized courses nga makatabang sa ilang career advancement sa gobyerno ug sa bisan asang organisasyong sibil.
Samtang, ang DNLI management team, pinangulohan ni Executive Director Dr. Mervin Jay Suaybaguio, mipasalig sa padayon nga suporta alang sa mga estudyante. Gipasabot usab nga isip benepisyaryo sa usa ka talagsaong programa sa gobyerno, ang mga estudyante ginapahinumdoman sa ilang mga responsibilidad ug obligasyon sa ilang edukasyon.
Ang regular nga klase ipahigayon matag Sabado ug Domingo sa mga pasilidad sama sa Bulwagan ng Karunungan, PAGRO Training Hall, PDRRMO Conference Room, ug DNSC main campus.
Writer: Lorna Tripoli
