Gipasundayag sa mga Persons with Disabilities (PWD) nga naggikan sa walo ka munisipalidad ug tulo ka siyudad sa probinsya ang ilang mga talagsaong talento sa sports ug arts atol sa gipahigayong National Disability Rights Week sa Davao del Norte Sports and Tourism Complex, Mankilam, Tagum City, niadtong Hulyo 18, 2024.
Sumala ni Provincial Social Welfare and Development Officer Rosalinda O. Rapista nga suportado ni Governor Edwin “Kuya Gov” Jubahib ang mga programa may kalambigitan sa mga PWDs, diin gimugna ang Provincial Disability Affairs Office.
“Si Kuya Gov is very much supportive sa atoang programa sa mga PWDs pinaagi sa PSWD ug karon namugna na gyud ang office, sa Disability Affairs Office. So, naa na gyuy kanunayng motutok sa inyoha para sa welfare sa atoang mga kaigsoonan nga susama kaninyo, pinaagi kang Engr. Ablin. Ug nanghinaut kami nga tagsa-tagsa ka LGUs ug opisina atong suportahan, dili lang karon,” sumala ni Rapista.
Sa mensahe ni Governor Jubahib nga gibasa sa iyang Executive Assistant Reynante Monares, gipaniguro niini ang patas nga pagtagad, paghatag serbisyo, ug paghatud sa mga programa sa mga kaigsoonang PWDs, bisan pa man sa ilang gihambin nga kakulangan.
“It is our duty to ensure their contributions are acknowledged and received. By celebrating abilities, we cultivate a culture of respect and empowerment that enriches us all. Advocating for access is essential in our journey toward inclusion. Accessibility in their passes is more than physical space. It encompasses access to education, employment, healthcare and social services,” sigon ni Monares.
Nipaambit sab sa iyang mensahe sa mga PWDs si District I Board Member Nicandro “Nickel” Suaybaguio, Jr. Gibatbat niini ang mga balaudnong nahimo alang sa hut-ong sa mga PWDs sukad pa kaniadtong konsehal pa siya sa Siyudad sa Tagum. Sama sa pagpakusog sa implementasyon sa Batas Pambansa 344 o Accessibility Law ug ang katukoran sa Provincial Disability Affairs Office isip usa sa nga division sa Provincial Governor’s Office nga maoy motutok sa mga panginahanglanon ug mga programa sa PWD dinhi sa probinsya.
“Katong nahimo kong konsehal ang atoang nabuhat isip paghatag ug pag-atiman sa rights sa atoang mga PWD kung mahinumdoman ninyo. Atoang gipakusgan ang pag-implement sa Batas Pambansa 344 or Accessibility Law. Pinaagi pud sa suporta sa akong mga kaubanan sa atoang unang termino, atoang napasa ang usa ka ordinansa diin na-institutionalize ang opisina isip usa ka division sa Provincial Governor’s Office kining gilingkoran karon ni Engr. Ablin,” ingon ni Suaybaguio.
Kabahin sa paugnat sa kusog nga gitigian sa mga PWD mao ang wheelchair basketball, swimming for deaf and orthopedic, ug table tennis. Samtang gibida sab sa mga PWDs ang ilang talento sa singing competition ug poster making contest.
Ang maong selebrasyon nakabase sa Proclamation No. 597 nga gipirmahan ni President Ferdinand “Bongbong” Marcos, Jr. niadtong Hunyo 13, 2024, nga nagdeklara sa Hulyo 17 hangtud 23 isip National Disability Rights Week.
Writer: Nestor Mata, Jr.
