Hapsay ug mabulukon ang gihimong prayer rally nga gipasiugdahan sa lokal nga panggamhanan sa Kapalong, nga nagdala sa mensahe sa panaghiusa ug kalinaw alang sa katawhan. Ang maong kalihokan, nga gitawag og "Peace Para sa Pinas," gipangunahan sa nagkadaiyang relihiyosong grupo, lakip ang San Isidro Labrador Parish, Southern Baptist Church, Imam sa Muslim Community, ug IP Community.

Sa pagdumala nila Kapalong Mayor Maria Theresa Timbol ug Bise Mayor Edgardo Timbol uban sa mga konsehal, ang rally nakapadasig sa mga lumulopyo nga maghiusa sa pag-ampo alang sa kalinaw sa nasud. Nagtambong ang daghang residente, estudyante, ug mga trabahante sa munisipyo, nagpakita sa tinuod nga diwa sa panaghiusa taliwala sa nagkalain-laing relihiyon ug estado sa kinabuhi.

Sa iyang mensahe, gibutyag ni Mayor Timbol ang gahum sa "KKK" alang sa Kapalong—Kristo, Kalinaw, ug Kalamboan. Gihisgutan usab niya ang mga kasamtangang hagit nga giatubang sa nasud ug ang kabalaka sa umaabot nga henerasyon.

"Siguro ang uban daghan dili kasabot, mixed ang emotion nga gibati. Kadaghanan naguol, kadaghanan we worry. Asa man diay padulong ang atong nasud? Unsa ang ikabilin sa atong next generation?" miingon si Mayor Timbol, nanawagan sa katawhan nga magtinabangay sa pagpalig-on sa espirituhanong pundasyon sa Kapalong.

Nagpahayag usab si Justine Dominique Pormilos, representante sa kabatan-onan, sa ilang pangandoy alang sa usa ka luwas ug matarung nga katilingban."We dream of a Philippines where every individual can grow up in safety, security, and dignity. We dream of a nation where every voice is heard," iyang ingon, nagpakita sa daku nilang pangandoy alang sa usa ka malinawon nga kaugmaon.

Nahuman ang prayer rally pasado alas-7 sa gabie sa Green Paradise, Maniki, Poblacion, Marso 12, 2025. Gitapos kini pinaagi sa makapahinumdom nga kanta nga "Heal Our Land," samtang ang suga sa mga cellphone maoy naghatag kahayag sa palibot—usa ka simbolo nga bisan pa sa mangitngit nga kahimtang, adunay paglaom nga mogimaw.

Writer: Lorna Tripoli