Opisyal nang gisugdan ang Davao del Norte Division Meet 2025 sa Davao del Norte Sports and Tourism Complex human sa tulo ka tuig nga pagpahulay niini tungod sa pandemya. Kini na ang ikatulong tuig nga napadayon ang division meet sa probinsya. Ang maong kalihokan giablihan kagahapong adlawa, Pebrero 13 diin gidayeg ang kadasig sa mga atleta.

Gisugdan ang seremonya sa usa ka sadya nga parada sa nagkalain-laing delegasyon, lakip ang AlPPa Explorer, Carmen Legions, DNRSA Eagles, Kapalong Cobras, New Corella Splashers, San Isidro Stallions, Sto. Tomas Mavericks, ug Talaingod Hawks, uban sa mga coaches, ug technical nga mga opisyal sa DavNor.

Naghatag og inspirasyon si Schools Division Superintendent Janette Veloso, pinaagi sa iyang mensahe para sa mga atleta nga ipadayon ang ispiritu sa kalinaw ug nga ang mga partisipante maoy bida sa makabag-ong panahon.

Nagpahinumdom ang Department Head sa Provincial Sports, Youth and Development Office nga si Giovanni Gulanes, nga dako ang papel sa mga ginikanan sa pagsuporta sa ilang mga anak.

Gisugat usab ni School Division Superintendent Reynaldo Mellorida ang kompetisyon pinaagi sa pagdasig sa tanang atleta nga ipakita ang sportsmanship, determinasyon, ug gugma sa dula.

Ang Chief Education Supervisor for Curriculum Implementation sa DepEd DavNor nga si Edward Amoguis, naglaom nga kini nga aktibidad mahimong sentro sa maayong panaghimamat, lig-on nga koneksyon, ug mahinungdanong disiplina.

“We expect that our learners would also demonstrate the skills through this competition. And aside from that... develop also the... sportmanship nila at tsaka yung discipline,” matud ni Amoguis.

Ang programa dakong tabang alang sa mga estudyante, ilabi na ang mga atleta nga dili mohunong sa ilang mga pangandoy. Ang maong mga atleta nga magmalampuson karong division meet mao ang modula karong umaabot nga DAVRAA nga ipahigayon gihapon sa DavNor Sports Complex.

Wrtier: Jeah Hermoso, OJT - Davao del Norte State College