Sa pinakaunang higayon, gilusad ang DavNor Youth Jam sa probinsya nga gipahinabo sa Bulwagan ng Karunungan, Provincial Capitol, Mankilam, Tagum City, niadtong Agosto 2, 2024. Aktibong gipartisiparan kini sa mga magtutungha sa upat ka mga eskwelahan: Davao del Norte Regional Sports Academy (DDNRSA), Tagum City National Comprehensive High School (TCNCHS), Laureta National High School, ug Rizal Memorial College, Tagum City.
Gipasundayag sa mga kabatan-onan ang ilang mga talento ug nipailalom sa basic psychological test, HIV screening, counseling, diskusyon sa teenage pregnancy ug mental health. Kini nga kalihokan kabahin sa kampanya sa DavNor Teen Tambayan, nga gipasiugdahan ni Governor Edwin "Kuya Gov" Jubahib, aron matabangan ang mga tin-edyer nga malikay sa mga isyu nga makadaot sa ilang kaugmaon.
Si Dr. Teresita Parreñas sa Provincial Health Office nanguna sa diskusyon uban ang mga teen volunteer educators. Gipasabot pag-ayo sa mga speakers ang mga hinungdan ug mga pamaagi sa paglikay sa mga suliran sama sa suicidal issues ug teenage pregnancy.
Samtang, gipahayag ni Christian Andacao, usa ka peer volunteer educator, nga tinguha sa DavNor Teen Tambayan nga malukop ang ilang programa ngadto sa tanang lokalidad sa probinsya.
"Is a part of the promotion sa atong teen tambayan since our teen tambayan na-locate sa door #8 sa sports complex and for level 3 na man ni siya ma’am. Isa pud kini nga activity, isa pud sa compliance nga mag-level 3 na sa accreditation sa atong Teen Tambayan and we are planning pud nga himuon ni siyang annual event," matud ni Andacao.
Writer: Lorna TripoliCameraman: Carl Singson
