Malampuson ang gipahigayong LGU Orientation ug Survey bahin sa mga programa ug serbisyo sa Davao del Norte Learning Institute (DNLI) nga gitambongan sa kapin 400 ka mga partisipante gikan sa tibuok probinsya sa Davao del Norte. Ang mga partisipante naglakip sa mga empleyado sa gobyerno nga wala pa nakahuman sa kolehiyo apan gusto magpadayon sa ilang pag-eskwela pinaagi sa mga programa nga gitanyag sa DNLI.
Ang maong kalihokan gitambongan sa mga representante gikan sa walo (8) ka mga munisipyo ug tulo (3) ka mga siyudad sa probinsya. Kini nga mga empleyado sa gobyerno nagpakita sa ilang dakong interes ug determinasyon nga makapadayon sa edukasyon bisan pa sa mga kalisdanan.
Sa mensahe ni Provincial Information, Communication and Knowledge Management Officer (PICKMO) ug ang Executive Director sa DNLI Dr. Mervin Jay Z. Suaybaguio, iyang gi-highlight ang kamahinungdanon sa padayon nga edukasyon alang sa personal ug professional nga paglambo sa mga empleyado sa gobyerno. Gipasalamatan sab niya ang mga partisipante sa ilang interes ug determinasyon nga magpadayon sa ilang mga pangandoy. Kalakip sab nga iyang gipasalamatan ang mga opisyales sa B.E. Dujali nga gipangunahan ni Mayor Leah Marie Moral-Romano sa pagpadayon sa DNLI para ipasibaw ang ilang mga programa.
“Magpasalamat pud mi’g dako sa pag-abiabi sa team sa DNLI, ilabi na sa atong mayora si Mayor Moral-Romano ug sa inyong mga opisyal sa Braulio Dujali. So, karon naa mi dinhi kay para i-present kung unsa mang mga programa ang ikadalit sa inyo sa atoang Davao del Norte Learning Institute… Ngano man gyud nga nag-marketing mi? Because despite sa among effort gyud nga makabalo ang tanan nianing atong programa, only a few, although daghan gyud kaayo ang nagpa-enroll pero naay uban, naa diay eskwelahan ang Capitol,” sumala ni Suaybaguio.
Si DNLI Senior Administrative Officer Samuelle Marione C. Sanchez, maoy naghatag og detalyadong presentasyon kabahin sa mga programa ug serbisyo nga gitanyag sa DNLI. Gipahayag niya ang mga kurso sa DNLI, nga naglakip sa Bachelor of Science in Public Administration, Bachelor of Science in Disaster Resiliency and Management, Bachelor of Science in Entrepreneurship, ug Master in Information Technology. Dugang pa, gipahibalo usab niya nga ang DNLI nagplano nga magtanyag og Master in Public Affairs ug Bachelor of Arts in Communication sa umalabot nga mga tuig, aron mahatagan pa og dugang oportunidad ang mga empleyado sa gobyerno nga magpalambo sa ilang kaalam ug abilidad sa serbisyo publiko.
Gipadayag ni Elaiza Encinarez, usa ka kanhi estudyante sa DNLI ug karon usa ka empleyado sa provincial government, ang iyang testimonya bahin sa iyang kasinatian sa DNLI. Ingon niya nga tungod sa DNLI, nakab-ot niya ang iyang mga damgo bisan pa sa mga kakulang sa edukasyon kaniadto.
“Wala may rason nganong dili ta mopadayon gud kay dali ra man ang DNLI. Dali lang ta’s lingaw, enjoy, mura ra gyud og normal students lang nga kanang naay quizzes, group activities, naay oral recitation, naay mga exam, naay thesis, naay OJT… If ever lang ma’am, sir nga mag-enroll mo sa DNLI, ayaw gyud ninyo’g sayangi ang chance kay sa tibuok province kita ra man ang naay ingon ani,” sulti ni Encinarez.
Usa sab ka madasigon nga pahayag ang gipakita ni Ronnie Campos, usa ka empleyado sa LGU B.E. Dujali, nga nigraduwar sab sa DNLI. Iyang gipaambit ang pagpasalamat sa oportunidad nga gihatag kaniya sa DNLI aron siya makahuman sa iyang pag-eskwela.
“Masulti nako sa DNLI nga it is a great opportunity gyud siya labi na sa wala gyud nahuman ang academic studies. Sama nato kung unsa man ang rason nganong wala nato mahuman, pultahan gyud siya nga naabli para makab-ot nato ang atoang mga pangandoy,” ingon ni Campos.
Ang mga programa ug serbisyo nga giduso sa DNLI naghatag og dakong tabang alang sa mga empleyado sa gobyerno nga gusto magpadayon sa ilang edukasyon samtang nagtrabaho, ug kini usa ka dakong lakang alang sa personal nga pag-uswag ug kalamboan sa probinsya sa Davao del Norte.
Writer: Nestor Mata, Jr.
