Liboan ka mga residente sa Distrito Uno ang gipailawom sa Tulong Panghanapbuhay sa Ating Disadvantaged/Displaced Workers (TUPAD) Profiling sa Department of Labor and Employment katambayayong ang buhatan ni Kongresista Pantaleon Alvarez sa DavNor Gym, DNSTC, Mankilam, Tagum City niadtong Agosto 16, 2024.

Sagad sa mga benepisyaryo nagagikan sa Siyudad sa Tagum kinsa nagsumite sa mga rekisitos nga giberipika sa DOLE Regional XI Field Office. Katuyoan niini nga ang modawat sa TUPAD Program mga kwalipikado gayud.

"Sa karon nagahimo mi og profiling sa mga moapil niining among programa sa TUPAD, and before sila makaapil aning programa sa TUPAD, gina-verify pud namo nga wala gyud pa sila kaapil og TUPAD sukad gikan January,” ingon ni Lalain Apugan, ang DOLE Focal.

Mokabat ₱4,620 ilang madawat subay sa minimum nga suholan nga ₱462 matag adlaw. Paghinlo sa mga kanal, pananom og kahoy, ug uban pa maoy ilang mga trabahuon diha sa komunidad.

Ang TUPAD hugtanong gisuportahan nila ni Congressman Alvarez duyog sa probinsyal nga panggamhanan ubos sa liderato ni Governor Edwin "Kuya Gov" Jubahib aron matabangan ang liboan ka mga katawhan nga hangtod karon wala pay saktong panginabuhian. Gipahayag ni Audrey Perez, ang usa sa mga tigpamaba sa kongresista, nga ang ilang buhatan maoy nag-ila sa mga benepisyaryo.

"Ang opisina ni Congressman Bebot Alvarez ang nag-identify sa mga benefeciaries, kay tungod kita ang nakabalo kung kinsa to nga displaced workers, disadvantaged sa mga workers nga anaa diri sa atong Distrito, especially dinhi sa lungsod sa Tagum," sulti ni Audrey Perez, District 1 Congressional Staff.

Samtang, mapasalamaton ang usa ka benepisyaryo nga apil siya sa maong programa.

"Dako kaayo ko’g pasalamat nga kini nga organization, kini nga tabang sa atong Congressman Alvarez, nga dako gyud kaayong pasalamat sa mga tao nga nanginahanglan gyud kaayo. Dako kaayong salamat Cong," matud ni Loriya Mastura, usa sa mga benepisyaryo.

Writer: Maria Lorna Tripoli