Subay sa selebrasyon sa World Day Against Trafficking in Persons 2024, gipahigayon sa Probinsyal nga Panggamhanan sa Davao del Norte pinaagi sa Provincial Social Welfare and Development Office ang Orientation-Seminar on Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) sa PDRRMO Training Hall, Capitol Compound, Mankilam, Tagum City, Hulyo 30, 2024.
Gisugdan ang maong selebrasyon pinaagi sa motorcade palibot sa nag-unang kadalanan sa Siyudad sa Tagum nga giubanan sa mga local social workers gikan sa mga LGUs sa probinsya, Philippine National Police, Department of Justice, ug uban pang mga lokal, ug nasyonal nga buhatan.
Gipasabot ni Provincial Prosecutor Mera Grace Mejos, ang Republic Act 11930 o Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act, diin iyang gibatbat ang mga gidili ug ang ipahamtang nga silot sa molapas niini.
“OSAEC refers to the acts itself. Kadtong sexual abuse ug exploitation. Ang CSAEM it refers to the materials being produced. It may or may not be produced, ang kaning mga materials. But regardless kung magbutang sila’g printed, kung mabidyohan sila or wala sila mabidyohi, still punishable under this law,” sulti ni Mejos.
Nipaambit si Provincial Prosecutor Norman R. Solis sa iyang taas nga kasinatian kabahin sa human trafficking. Samtang iyang gihatagan og dakong gibug-aton ang pagsunod sa mga law enforcers sa nakatakdang protocol sa pagdakop ug pagtaral sa hukmanan sa mga sad-an aron magmalampuson ang kaso nga ilang gi-file.
“Gidakop sa NBI, gipaylan kaso 7610 ug human trafficking. Unsay nahitabo? Dismissed. Ang sabot nato sa inter-agency council against trafficking, mag-coordinate mo sa prosecutor’s office, mag-coordinate mo sa DSWD or ang lokal nga PSWD o ang MSWD. Wala nila gibuhat ang coordination. So, nag-violate sila sa atoang protocol. Unsay nahitabo? Gi-dismiss ang kaso sa human trafficking,” sumala ni Solis.
Ang seminar nagtumong sa pag-edukar sa mga partisipante bahin sa kahimtang ug gidak-on sa online nga pag-abusong sekswal ug pagpahimulos sa mga kabataan. Naglakip kini sa pagsabot sa lain-laing aspeto sa pag-abuso, mga taktika nga gigamit sa mga sad-an, ug ang epekto niini sa mga biktima.
Writer: Nestor Mata, Jr.
