Usa ka dakong lakang alang sa pagpalambo sa kaayohan sa panglawas sa mga empleyado ang gihimo sa Probinsyal nga Pangagamhanan sa Davao del Norte sa gihimong pag-abli ug blessing sa DavNor Workforce Health and Wellness Center niadtong Septyembre 16, 2024, sa Old SP Building, Government Center, Mankilam, Tagum City.
Ang bag-ong pasilidad gitukod aron matubag ang pisikal ug mental nga panginahanglan sa mga empleyado sa gobyerno, nga nagpakita sa tinud-anay nga paningkamot sa probinsya nga suportahan ang maayong panglawas ug produktibidad sa mga kawani.
Gipangunahan ni Governor Edwin “Kuya Gov” Jubahib ang maong seremonya inubanan sa mga department heads ug mga empleyado sa kapitolyo. Sa iyang mensahe, gibutyag sa gobernador ang kamahinungdanon sa maayong panglawas sa mga trabahante aron paghatud sa mas maayo ug dekalidad nga serbisyong gikinahanglan sa katawhan.
“Ang gusto nato atong matabangan ang atong mga empleyado nga mahimong healthy, mao na’y ginaingon pirme nga “health is wealth”. Dinhi sa atong probinsya na-realize nato ang meaning sa “health is wealth” because nagtukod ta karon og medical clinic. Naa ta’y health and wellness, then naa pa’y psychiatric clinic ug dental clinic,” sumala ni Kuya Gov.
Ang DavNor Workforce Health and Wellness Center maghatag ug nagkalain-laing serbisyo, lakip na ang regular nga medical check-up, stress management programs, mental health counseling, ug uban pang mga serbisyo alang sa panglawas. Lakip usab niini ang mga wellness seminar ug workshops aron matubag ang mga kabalaka kabahin sa panglawas sa mga empleyado.
Nipaambit sab sa ilang tagsa-tagsa ka mensahe sila si Provincial Administrator Engr. Josie Jean Rabanoz, Provincial Health Officer Alfredo Lacerona, ug Provincial Human Resources Management Officer Edwin Palero.
“We do believe nga lahi gyud kung naa gyuy blessing from our Almighty Father. Thus, we have this occasion today to formally bless this building and we’re so thankful to Kuya Gov nga naa gyud karong buntaga nga mo-join sa atoa diri mga empleyado para sa very memorable nga event for this building,” matud ni Engr. Rabanoz.
“Kabalo man ta tanan nga pag-healthy ta, happy ta. Mao pud na ang unang instruction ni Kuya Gov, kay ngano man daw sige mi’g adto sa field, sige’g panambal unya ang iyang mga sakop dinhi sa capitol tambalanan. Isa na siya ka rason nganong nahimo ni siya. And, pasalamat lang gyud ta for the effort ug nga gipangusgan gyud ni Kuya Gov. Kuya Gov, daghan kaayong salamat,” sulti ni Dr. Lacerona.
“Kining tanan mando ni Kuya Gov, igo ra gyud ko nituman sa iyang mando. Kay kadtong nag-istorya mi, niingon gyud siya nga pangita gyu’g paagi nga makahatag gyud ta og maayong serbisyo sa atong mga empleyado. Kay ang atong mga empleyado mao nay maghatag nato og garbo sa atoa,” sigon ni Palero.
Ang pag-abli sa DavNor Workforce Health and Wellness Center nagpakita sa aktibong paningkamot sa probinsyal nga panggamhanan aron hatagan og prayoridad ang panginahanglang medikal sa mga empleyado, nga magmugna og usa ka mas positibo ug hamugaway’ng lugar.
Ang kalihokan natapos sa usa ka tour sa bag-ong pasilidad diin gipakita ang mga serbisyong ipatuman alang sa kaayohan sa mga kawani sa probinsya.
Writer: Nestor Mata, Jr.
