Gatosan ka mga residente gikan sa Sitio Nasilaban, Barangay Palma Gil, Talaingod, ang miapil sa landslide drill nga gipahigayon sa bukirang bahin sa probinsya kaniadtong Septyembre 26, 2024, isip kabahin sa 3rd Quarter National Simultaneous Earthquake Drill.
Ang kalihokan gipangulohan sa Provincial Government of Davao del Norte, uban sa mga ahensya nga nakatutok sa kaluwasan ug emerhensiya sama sa Provincial Disaster Risk Reduction and Management Office (PDRRMO), Bureau of Fire Protection (BFP), Philippine National Police (PNP), ug Philippine Army (PA).
Pagkadungog sa kampana nga nagpasabot sa usa ka landslide sa ilang lugar, ang mga lumulupyo daling migawas sa ilang balay, dala ang ilang mga importante gamit ug mga gagmay’ng anak, padulong sa luwas nga lugar o sa nakatakdang evacuation area.
Gipasundayag sa PDRRMO ug uban mga ahensya ang rescue operations, diin gipakita nila ang ilang abilidad sa pagluwas sa mga biktima nga nasangit sa ilalom sa pangpang nga naguba tungod sa landslide. Gamit ang modernong mga kagamitan ug mga pamaagi sa pag-rescue, gialsa nila ang biktima gikan sa ubos ngadto sa luwas nga lugar aron matambalan dayon.
Sa mensahe ni PDRRMO Head Glenda Delideli, iyang gi-highlight ang importansya sa aktibidad sa pagpangandam sa komunidad alang sa bisan unsang katalagman nga posibleng moabot.
“Kung pwede lang gani himoon nato matag bulan aron makahinumdom gyud ta kung unsa atong himoon panahon nga dunay mahitabo. Wala man ta nangandoy nga mahitabo ang maong landslide pero mas maayo nga andam ta,” sulti ni Delideli.
Si Executive Assistant Jun Agudera ug kanhi Board Member Roger Laguna, maoy nirepresentar kang Gobernador Edwin "Kuya Gov" Jubahib sa maong kalihokan. Iyang giila ang suporta sa mga residente ug giingon nga ang probinsyal nga panggamhanan nagpadayon sa pagpasiugda sa mga aktibidad nga maghatag kahibalo sa katawhan. Ilabi na sa mga lumulupyo sa kabukiran.
“Tanan nga mga paglantaw, makalsada man, maayuda man, ug uban pa nga kailangan gyud nga ihatag nga tabang, ang atong mga programa sa gobyerno nakasentro sa atong mga marginalized nga mga kaigsoonan, sama natong mga lumad nga naa dinhi. So, ing-ana mga igsoon ang atong Kuya ng Masa Kuya Gov Edwin I. Jubahib, naghatag sa kanunay sa iyahang mga pagpangga ug pag-amuma nato nga naa sa mga kabukiran,” matud ni Laguna.
Ang landslide drill nahimong malampuson gumikan sa dakong suporta nga gipakita sa mga residente nga mapasalamaton sa katakos ug determinasyon sa mga rescuer sa pagluwas sa mga kinabuhi panahon sa kalamidad.
Writer: Nestor Mata, Jr.
