Kapin gatos ka pamilya ang gihatagan og mga pahalipay ug salapi sa Family Week Celebration nga gipahigayon sa Capitol Compound, Mankilam, Tagum City. Gipasidunggan sa Probinsyal nga Panggamhanan, ubos sa pagdumala ni Governor Edwin I. Jubahib, ang 11 ka Huwarang Pamilya, napulo ka Child Exemplary Winners, ug mga Municipality/City Local Council for the Protection of Children (LCPC) ug LCAT-VAWC Functionality Awardees.
Unom ka local government units (LGUs) ang nakadawat og tag-usa ka desktop computer set with printer ug gikatakdang mosunod ang lima pa ka units, para sa mga LCPC aron mapalambo ang ilang serbisyo.
Ang Provincial Social Welfare and Development Office (PSWDO) ang nagdumala sa maong pagtunol sa mga pahalipay.
Sa usa ka bahin, si Police Major Anjanette Tirador sa Davao del Norte Police Provincial Office (DNPPO) naghatag pahimangno ngadto sa mga ginikanan kalabot sa Anti-Online Sexual Abuse and Exploitation of Children atol sa Provincial Parent Effectiveness Seminar nga may temang, "Pamilyang Tumutugon sa Pagbabago ng Panahon."
Sulti niya, kung ang ginikanan mismo mag-post sa mga hubo nga hulagway sa ilang mga anak diha sa social media, mag-atubang kini og silot sa balaod. Giawhag sab niya ang publiko dili magpanuko sa pagreport sa samang mga insidente sa awtoridad.
Si Provincial Administrator Engr. Josie Jean Rabanoz nidasig sab sa mga ginikanan nga giyahan ang ilang mga anak taliwala sa mga pagbag-o sa panahon dala sa modernong teknolohiya. Samtang, si PSWDO Head Rosalinda Rapista nagbatbat sa kamahinungdanon sa kalig-on sa pamilya isip pundasyon sa katilingban.
"Ang pamilya gyud mao ang basic foundation diha sa atoang society. So, kung ang pamilya nga naghugpong gyud, mo-expect pud ta nga mao pud ang output nato sa atoang tagsa-tagsa ka barangay, sa atoang city, ug munisipyo nga asa ta gikan," sumala ni Rapista.
Usa sa mga gipasidunggan, si Mrs. Sara Enrico, usa ka ice cream vendor gikan sa Tagum City, nga nakadaog sa Huwarang Pamilya Award. Emosyonal siyang nagpasalamat sanglit bisan pa sa kadaghan nilang nasugatan nga pagsulay, ilabi na ang aksidente diin naputlan siya og tiil ug na-fracture ang gusok sa iyang bana human silang nabanggaan sa usa ka ten-wheeler truck, nagmalampuson gihapon nga nakabangon ang ilang pamilya.
"Unang-una gyud, dako ko og pasalamat sa Ginoo. Usa ka pribilehiyo nga makadaog sa huwarang pamilya. Kabalo ang Ginoo tanan kung unsa gyud amoang pamilya, mga pagsulay amoang nalabang tungod sa tabang sa Ginoo, kaluoy sa Ginoo. Sa programa sa 4Ps, tungod kay 4Ps mi member, dako kaayo’g ikatabang sa amoa. Ang mga tao nga nagpalibot sa amoa, dako’g tabang sa amoa. Naka-survive mi, hangtod karon naa pa mi. Glory to God! Buo amoang pamilya," ingon ni Mrs. Enrico.
Mapasalamaton usab si Mrs. Enrico sa suporta sa 4Ps ug sa gobernador sa probinsya.
Writer: Lorna Tripoli
