Nanawagan sa proteksyon sa yutang kabilin ug pag-asdang sa tinuod nga kaayohan sa katawhang lumad ang Kalinaw Southeastern Mindanao Region (SEMR) atol sa press conference sa VIP Clubhouse, DNSTC, Mankilam, Tagum City,Hulyo 16, 2024.
Ang mga Indigenous People (IP) nga kanhi nagpasakop sa New People’s Army (NPA) ug karon naa sa SEMR, nagpagula sa ilang sentimento bahin sa pait nga kasinatian sa rebolusyon.
"Labi na sa katigulangan namo giingon nga kung unsa ang angay ikatabang sa duha ka armado atong dawaton. Kung motabang ang sundalo atong dawaton, at least para sa atong kaayohan. So, mao to ang nahitabo hangtod sa 2014. Diha na sige mi’g kabulabog kay magbahin man gyud ang duha ka armado. Buylo na ang militar mosubida ug nakaposisyon na diha ang NPA. So, diha apektado na mi," matud ni Lieutenant Apoga, kanhing Commanding Officer Subregional Guerrilla Unit.
"Grabe na ang epekto. Halos ako hangtod, gikan sa pagsugod hangtod sa akong pagsurender, sero ko sa akong panginabuhian ug nagpundar ko og balik," ingon ni Bartolome Arcala, kanhing Political Instructor Guerrilla Front 55.
Kapin 500 ka mga IPs ang naghiusa sa pagbaktas paingon sa DavNor Sports and Tourism Complex, bitbit ang placards nga nagpakita sa ilang panawagan alang sa hingpit nga kalinaw, edukasyon, ug kalamboan. Kini ilang gihimo human sa desisyon sa korte batok kang Bayan Muna Partylist Representative Satur Ocampo nga nakit-an nga guilty sa child abuse ug diskriminasyon sa mga kabataang IPs.
Si Arian Jane Ramos, alyas Marikit, Presidente sa Kalinaw SEMR, midawat sa desisyon batok kang Ocampo ug nagkanayon nga kini ang pagpakita sa ilang pagkahiusa sa panawagan sa hustisya alang sa mga tribu. Sa press conference, gihimo usab ang usa ka ritwal alang sa pagdagaya sa kalinaw.
"Ito po ay pagkakaisa namin sa panawagan ng hustisya para sa mga kapatid nating katutubo. Hindi naman natin masasabi na ganap na talaga na maibigay sa kanila, kung hindi tinatanggap ng Ka-SEMR ang desisyon sa korte against kay Satur Ocampo sa kanilang case against R.A. 7610, Special Protection of Children Against Child Abuse," sulti ni Ramos.
Ang Kalinaw SEMR nanawagan nga ihatag sa mga Kabataang Ips ang tinuod, subay sa curriculum sa Department of Education, ug dili sama sa ilang nasinatian sa kamot sa mga rebelde nga sa linghod nga pangidaron gibansay na sa dugoong pakigbisog ug pakigbatok sa gobyerno.
Samtang, ang probinsya sa Davao del Norte, ubos sa pagdumala ni Governor Edwin "Kuya Gov" Jubahib, nagpadayon ang paningkamot nga magpabiling insurgency-free ang probinsya.
Writer: Lorna Tripoli
