Mokabat sa 3,168 ka mga Agrarian Reform Beneficiaries (ARBs) sa Davao Region ang nakadawat sa titulo sa yuta nga walay bayad atol sa usa ka programa nga gipahigayon sa Panabo Gym, Nobyembre 17, 2024. Ang kalihokan gidumala sa Department of Agrarian Reform (DAR) Region XI nga gitambongan sa mga ARBs gikan sa Davao del Norte, Davao de Oro, Davao Oriental, Davao del Sur, ug Davao City.

Dakong kalipay ang gibati sa mga benepisyaryo. "Taos-pusong nagpapasalamat sa Department of Agrarian Reform (DAR) sa kanilang tulong na maging daan upang magkaroon ako ng sariling titulo ng lupa," matud ni Marina Española, usa sa mga nakadawat.

Samtang, nihangyo si Governor Edwin I. Jubahib nga tarungon nila ang ilang mga titulo ug tagaa’g kabug-aton ang tabang sa panggamhanan pinaagi sa pagpalambo sa ilang mga kayutaan. "I hope kining mga yuta inyo ning ampingan kay kini naging part na sa inyong kinabuhi ug sa inyong pamilya ug dili lang para sa inyoha kondili para ni sa inyong future generation," sulti niya.

Gibutyag sab ni DAR Undersecretary Kazel Celeste nga padayon ang tabang sa nasyonal, partikular na ang DAR, alang sa mga ARBs. “Hayaan n'yo po kaming pagsisilbihan kayo nang tapat at siguradohing mas marami pang suporta ang ibibigay namin para sa ating mga Agrarian Reform Benefeciaries, lalo na dito sa Agrarian Reform Benefeciaries ng Davao Region," maoy iyang ingon.

Samtang, dungan sab gihimo ang distribusyon sa titulo sa ubang rehiyon sama sa Ilocos, Caraga, ug Socsargen.

Sa nasangpit nga okasyon, nitambong si DAR Regional Director Janil Amatonding, Jr., ang mga city, municipal, ug provincial agrarian reform officers, ug mga representante ni Panabo Mayor Jose Relampagos.

Writer: Lorna Tripoli