Subling gihatagan og gibug-aton ni Governor Edwin “Kuya Gov” Jubahib ang hingpit nga suporta sa mga provincial officials aron molampos ang iyang mga programa ug proyekto aron sa kaayohan sa katawhang Dabaonon.
Sa gipahigayon nga Oplan KKK (Kaagapay sa Kalinaw ug Kalamboan) sa Kimamon, Santo Tomas, Davao del Norte niadtong Oktubre 29, gireklamo sa gobernador ang kanunayng pagbabag sa mga miyembro sa Sangguniang Panlalawigan (SP) sa iyang budget alang sa mga proyekto sa kabarangayan.
“Ako isip inyong gobernador naningkamot pud ko nga matubag ang ilahang mga request (sa mga barangay officials) nga mga proyekto… Ang problema lang kung dili nato kaalyado ang vice governor ug ang mga board members, sila pud ang mahimong babag sa atong tanan nga pagpaningkamot nga madeliber ang mga serbisyo kaninyo tungod kay mao man sila ang magsige og pugong nga i-approve ang atong budget. Mao nga lisud kaayo,” maoy sumbong ni Kuya Gov sa katawhan.
Tungod niini, mihangyo siya sa katawhan nga hatagan siya og saktong katimbang sa kapitolyo nga hingpit nga mosuporta sa tanan niyang mga programa ug proyektong pangkalamboan.
“Mohangyo ko kaninyo, hatagi ko’g akong katimbang diha sa kapitolyo. Hatagi ko ninyo’g vice governor nga dili na gyud magluib kanako ug andam moserbisyo kaninyo,” sulti sa gobernador.
Ang ginapasabot ni Kuya Gov mao ang suporta alang sa iyang anak nga si Clarice nga iyang ka-tandem isip pagka-bise gobernadora sa umalabot nga eleksyon sunod tuig, lakip na ang iyang kompletong line up sa mga board members sa District 1 ug 2.
Liboan na usab ang nakapahimulos sa daghang mga serbisyo nga gihatod ni Kuya Gov, kauban ang mga department heads sa nagkalainlaing opisina sa Kapitolyo ug uban pang mga ahensiya sa gobyerno.
Ang mga benepisyaryo gikan sa mga clustered barangays sa Kimamon, Lunga-og, Pantaron, ug Talomo nakadawat sa mga serbisyo nga sama sa dental and medical services, x-ray, agriculture and veterinary services, tambag legal, libreng gupit, livelihood training, semilya ug abono sa mga gulay ug prutas ug daghan pang uban.
Miduyog sab sa maong okasyon ang mga ahensya sa Department of Labor and Employment (DOLE), TESDA, Philippine National Police (PNP), Philippine Army, ug uban pa.
Writer: Noel Baguio
