Gitunol ang pinansyal nga ayuda sa mga distressed Overseas Filipino Workers (OFWs), ug biktima sa sunog ug ipo-ipo sa Davao del Norte ubos sa Emergency Shelter Assistance (ESA) program ni Gov. Edwin I. Jubahib. Ang Provincial Social Welfare and Development Office (PSWDO) ang nangulo sa distribusyon sa hinabang nga gihimo sa PGO conference room niadtong Hunyo 20, 2025.
Usa sa nakadawat si Caren Jumaw-as, OFW ug residente sa Panabo City, nagsulti nga dako og tabang kanila nga mga OFWs ang gihatag nga suporta sa sama kaniya nga niuli gikan sa laing nasod gumikan kay aduna nay gihambin nga balatian.
“Pag-abot gyud mismo sa airport sa Davao, diretso ko sa OWWA ug DMW nga diin aduna koy na-meet nga mga Filipina pud nga niingon sila nga adunay ingon-ani nga assistance… Nalipay kay siyempre may na lang makatabang pud sa amoang kinahanglan pareha sa amoha nga mouli mi usahay ang uban walay dala nga kwarta,” sulti ni Jumaw-as.
Usa usab ka benepisyaryo sa ESA nga tag-iya sa panimalay nga naigo sa naghaguros nga hangin nagsaysay sa iyang kasinatian.
“Natunga ang akong balay, as in natunga gyud siya. Ma’y gani gibinlan pa gyud ko’g akong tulganan,” ingon ni Aduana.
Samtang, usa ka biktima sa sunog nga taga-Sto. Tomas nagbutyag sa PTV News coverage team nga bisan unsang butang walay nabilin human gilamoy sa kalayo ang ilang panimalay. Iyang gipasalamatan ang probinsya ug ang gobernador sa tabang pinansyal nga ilang nadawat.
“Dali ra kaayo oi. Pag-abot sa bombero dili na matabang, ugdaw na… Pasalamat kaayo ko nga naay gamay nga ika-assistance sa mga katawhan sa gobyerno,” matud ni Cuevas.
Gipasabot sa representante sa gobernador nga dili man dako ang kantidad nga gidawat sa mga biktima apan makatabang na kini sa mga batakan nilang panginahanglan.
“Bisan pa man nga anaa ta sa kasubo kay naay mga nahitaboan apan si Kuya Gov tungod sa iyang mga initiatives, services gihatagan og tabang ang tanan nga nanginahanglan. Dili man sa ingon nga dako kaayo nga kantidad apan makatabang sa ginagmay sa atong panginahanglan,” pasabot ni Jemuel Melmida, representante ni Gov. Jubahib.
Sa kinatibuk-ang kantidad P179,000 ang giapod-apod ngadto sa 33 ka mga benepisyaryo sa Emergency Shelter Assistance (ESA) isip tabang nga nagadepende sa kadaut sa ilang mga propiedad. Ang maong ayuda gituyo aron matabangan ang mga biktima sa mga kalamidad nga nakaapekto sa ilang panimalay.
Samtang, ang 22 ka mga OFWs nga namauli sa nasud nakadawat usab og tabang pinansyal nga mokabat og P110,000 sa kinatibuk-an. Ang maong inisyatibo kabahin sa padayon nga paningkamot sa gobyerno aron suportahan ang mga OFWs ug lokal nga mga residente nga apektado sa mga kalisud.
Gilauman nga kini nga mga hinabang makatabang sa pagbangon ug pagpadayon sa ilang panginabuhi human sa mga pagsulay.
Writer: Lorna Tripoli
