Ang kalampusan usa ka makapaikag nga pagpangandoy nga di sayon kab-oton. Apan alang sa usa ka empleyado nga mitiwas og eskwela, kini usa ka panaw nga puno sa kalisdanan, paningkamot, ug dakong pagtoo.
Si Michael Royce C. Nasol, 26-anyos, niagi og daghang pagsulay sa kinabuhi aron lang makab-ot ang iyang damgo nga makahuman sa pagtuon. Nagsugod siya sa iyang kolehiyo sa AMA Computer College apan niadtong 2014, naundang tungod sa kakulang sa pondong pinansyal.
Tungod niini, napugos siya’g sulod og trabaho sa Brgy. Magugpo North hangtud nga naadto sa LGU Tagum. Didto niya nadunggan ang kabahin sa Davao del Norte Learning Institute (DNLI), ang usa ka oportunidad nga wala gyud niya pakyasa aron matiwas ang pag-eskwela.
Dinhi nasulayan ni Michael ang kalisud sa pagdungan sa trabaho ug eskwela apan wala siya nagpatarog sa maong hagit.
“Usahay di man gyud nato malikayan, lisud man gyud nang magtrabaho ka unya nag-eskwela, idungan nimo. So, siyempre mokaon gyud siya’g time. So, akong gibuhat ana, naghimo gyud ko’g time management. Siyempre, naa gyud kay ma-sacrifice ana… Successful gyud siya karon. Nakita nako nga worth it ra pud sa last,” matud ni Nasol.
Gibtyang ni Michael ang sekreto sa iyang kalampusan nga mao ang pag-una sa Ginoo ug ang pagtoo nga ang matag kalisdanan madaug pinaagi sa paningkamot ug pagsalig.
“Sekreto gyud nako is unahon gyud ang Ginoo… kay if mangayo ta sa Iyaha og guidance, always gyud na Siya maghatag sa imoha kung mo-obey lang gyud ka sa Iyahang mga gusto. Ug imoha pung paningkamotan nga dili ka mohatag og kadaut sa uban,” ingon niya.
Duyog sa dul-an 900 ka mga graweyts sa Davao del Norte State College karong tuiga, nalampos ni Michael ang kursongBachelor of Science in Entrepreneurship – Special Program for Adult Education isip Cum Laude, siya ang nag-inusarang nakagradwar nga nakadawat og Latin Honorssa maong kategorya.
Sakaron, nagatrabaho siya sa LGU Davao de Oro ug minyoonon na sa iyang kasamtangang trato.
Ang DNLI, usa ka espesyal nga programa sa gobyerno nga naghatag og oportunidad sa mga empleyado, opisyal, ug functionaries sa Davao del Norte aron makaangkon og dekalidad nga edukasyon uban sa tabang sa mga partner institutions sama sa DNSC.
“As for this school year naa tay around 19 graduates sa atoang Bachelor of Science in Entrepreneurship. Naa tay usa sa Bachelor of Science in Disaster Resiliency and Management. And if I’m not mistaken, around 15 or 16 sa Bachelor of Public Administration. Naa pud tay pipila ka graduates from our other partner institutions which is USTP sa ilahang Master in Public Administration,” matud ni Samuelle Marionne Sanchez, MA, SAO, Knowledge and Information Management Division (KMD), PICKMO
Sa umalabot nga school year, magpadayon ang DNLI sa pagtanyag og mga undergraduate ug master programs, sama sa Bachelor of Science in Entrepreneurship, Bachelor of Science in Disaster Resiliency and Management, Bachelor of Public Administration, ug Master in Information Technology.
Si Michael Royce Nasol nagpakita nga ang kalampusan makab-ot pinaagi sa pagkugi, pagtoo, ug pagbarog sa mga pangandoy bisan unsa pa ang mga pagsulay.
Writer: Jun Rey Villanueva