Malampusong gipahigayon sa Libuganon Elementary School, Tagum City, niadtong Hunyo 19, 2025, ang 2nd Quarter Nationwide Simultaneous Earthquake Drill (NSED), nga gitumong aron mapalig-on ang kahibalo ug kaandam sa publiko batok sa katalagman sama sa kusog nga linog ug posible nga tsunami.
Eksaktong alas-9 sa buntag, gipatingog ang sirena nga nagtimaan sa pagsugod sa drill. Dayon nisunod ang coordinated response sa mga rescuers, volunteers, ug emergency units gikan sa PDRRMO, CDRRMO, Bureau of Fire Protection, Philippine National Police, kasundalohan, DSWD, Red Cross, DepEd, ug uban pang ahensya. Gipakita nila ang kahusay sa pagresponde sa mga naipit sa natumpag nga mga istruktura ug sa pagluwas sa mga samaran.
Apil sa senaryo ang posibilidad sa tsunami, diin gibakwit ang mga residente sa coastal barangay sa Libuganon. Dala nila ang ilang mga anak ug kahayopan paingon sa designated evacuation center sa Libuganon Elementary School. Didto, giatiman sila sa mga social ug health workers, samtang gihimo ang standard duck, cover, and hold procedure.
Gipresentar usab sa mga tagdumala sa dagkong istruktura ang blueprints sa ilang mga building ngadto sa mga responder aron mas dali ang search and rescue operations.
Sa wala pa ang simulation, usa ka programa ang gipahigayon sa eskwelahan nga gitambongan sa mga representante gikan sa Office of Civil Defense, DepEd, Philippine Coast Guard-Tagum, ug DSWD Region XI. Gipasabot sa mga opisyal ang ilang kahandam ug determinasyon sa pagtabang sa mga biktima sa kalamidad. Matod sa DSWD, “Matag kinabuhi importante, ug matag segundo bililhon.”
Ang maong kalihokan kabahin sa padayon nga kampanya sa gobyerno aron ipahibalo sa katawhan ang importansya sa preparasyon batok sa posibleng pag-abot sa gitawag nga “The Big One.”
Writer: Lorna Tripoli
