Gipangayo ni Governor Edwin “Kuya Gov” Jubahib ang tumang kakugi, dedikasyon, ug pinakataas nga kalidad sa trabaho sa mga empleyado sa Kapitolyo sa pagtuman sa ilang mga katungdanan ug responsibilidad.

Gihatagan og gibug-aton sa gobernador nga dili lang igo ang pagsunod sa mga empleyado sa mga lagda ug palisiya ug siya nimando kanila sa pagbuhat sa pinakamaayo aron dili masayang ang kwarta sa katawhan nga ginasweldo kanila.

“Ayaw mo pagtrabaho nga just for compliance lang sa inyong daily works. Kinahanglan inyong i-perform ang inyong duty (nga labing maayo),” sulti niya, atol sa Convocation Program sa Kapitolyo para sa bulan sa Agosto nga gipahigayon sa DavNor Gym ganinang buntag.

Gimandoan ni Kuya Gov ang mga empleyado nga wala na ganahi motrabaho ug igo na lang nagpasinaw sa ilang sampot sa pag-resign.

“Basi’g wala na mo gana motrabaho kuyog nako? Pang-resign na mo! Ang akong gusto nga kauban katong motrabaho. Katong daghan og complain kay dili motrabaho nga mahimong busy kay gusto lang pasinaw sa lubot, andam ko modawat sa inyong voluntary resignation… Kung di mo ganahan motrabaho og ensakto nga gisweldohan mo sa katawhan sa Davao del Norte, pagtukod mo’g inyong sariling kompanya o negosyo. Ayaw mo panarbaho sa gobyerno,” pahimangno niya.

Kahinumdoman nga gipakita ni Kuya Gov ang iyang dili hitupngan nga sinseridad, grabeng kakugi ug tumang dedikasyon sa trabaho sa iyang duha ka termino ug siya misaad nga iya kining triplehon sa iyang ikatulo nga termino.

Gipangayo niya ang dakong suporta sa mga empleyado aron matuman ang iyang mga saad ug matiwas ang mga proyekto nga wala pa mahuman alang sa tinuod nga kalamboan sa probinsya.

Pero, nadismaya ang gobernador sa iyang nadiskubre nga pipila pa diay ang mga proyekto nga gisugdan sa iyang administrasyon nga wala pa mahuman ug wala siya nahatagan og saktong “update” mahitungod niini.

“Dapat ang project nato kinahanglan mahuman sa iyang timeline. Kung naa ma’y extension kinahanglan ma-follow-up ang tanang projects… Since 2020 pa hangtud karon, naa pay mga projects nga wala pa nangahuman. Unya, wala mo nag-report kung kinahanglan ba nga mahatagan nato og additional nga budget,” sukmat niya sa hingtungdan nga opisina.

“Wa na tay amigohay karon. Kinahanglan nako ang ensaktong trabaho,” maoy pasidaan ni Kuya Gov.

Writer: Noel Baguio