Malampusong gipahigayon ang 2024 Provincial Nutrition Congress sa DavNor Gym, DNSTC, Mankilam, Tagum City, kaniadtong Disyembre 10, 2024, nga may temang “Pagpanguna sa Nutrisyon alang sa Tanan.”

Ang maong kalihokan gitambongan sa mga doktor, mga nutrisyonista, ug mga Barangay Nutrition Scholar (BNS) gikan sa nagkalain-laing dapit sa probinsya. Ang kongreso nagpunting sa kamahinungdanon sa koordinasyon ug pagtinabangay aron mapalambo ang kahimtang sa nutrisyon sa Davao del Norte. 

Sa iyang mensahe, gipadayag ni Dr. Josephine Therese Pareñas ang mensahe ni Provincial Health Officer Dr. Alfredo Lacerona, nga nag-awhag sa tanang ahensya ug stakeholders nga magpadayon sa paghatag ug suporta aron makab-ot ang maayong nutrisyon alang sa tanang mga residente. Siya nagkanayon nga ang nutrisyon dili lang usa ka isyu sa panglawas, apan usa usab ka prayoridad aron masiguro ang kalamboan sa komunidad.

Si Executive Assistant III Jemuel Melmida mibasa usab sa mensahe ni Gobernador Edwin "Kuya Gov" Jubahib, nga nagpasalamat ug naghatag og pasidungog sa tanang partisipante sa ilang dedikasyon sa pagpasiugda sa nutrisyon. Gipadayag sab sa gobernador ang iyang komitment sa pagsuporta sa mga inisyatibo nga magpalambo sa nutrisyon ug kahimsog sa matag Dabaonon.

Atol sa maong kalihokan, giila ang Munisipyo sa Asuncion isip Provincial Outstanding LGU in Nutrition Monitoring. Kini nga pasidungog nagpakita sa ilang maayo nga programa ug inisyatibo alang sa nutrisyon nga miresulta sa maayong kalampusan sa ilang lugar. 

Writer: Nestor Mata, Jr.