Giinagurahan ang bag-ong duha ka andana nga Davao del Norte Provincial Forensic Unit (DNPFU) niadtong Mayo 22, 2025, nga nahimutang sa DNPPO National Highway, Visayan Village, Tagum City. Usa kini ka pasilidad nga gilaumang makatabang sa mas dali ug epektibong pagsulbad sa mga krimen sa probinsya.
Ang seremonya gisugdan sa usa ka mubo nga programa nga gisundan sa ribbon cutting, unveiling sa marker, ug blessing sa pasilidad. Ang pormal nga turnover sa yawi gipangulohan ni Special Assitant to the President Antonio Lagdameo Jr., pinaagi ni Governor re-elect Edwin I. Jubahib, ug gidawat sa kapulisan sa pagpanguna ni Forensic Group Director PBGen Benjamin Sembrano, Provincial Director PCol Alexander Serrano Jr., PLtCol Agustina Ompoy, PLtCol April Fabian, ug uban pang opisyal sa kapulisan.
Matud ni PBGen Sembrano, dako’g papel ang pasilidad sa pagpalig-on sa kahapsay ug kalinaw, ug sa pakigbatok sa krimen.
Ang forensic group, sumala pa niya, maoy gitugot nga motipig sa mga ebidensya gikan sa crime scene sama sa armas, bala, droga, ug uban pa — ug dili kini pwede ibutang sa kustodiya sa lokal nga kapulisan. “Ang forensic unit ang partner sa local police, pero sila ra gyud ang authorized nga mohawid sa ebidensya,” sulti ni Sembrano.
Gipasalamatan usab ni Sembrano ang mga lokal nga opisyal sa ilang suporta sa pagtukod sa DNPFU, nga gitawag niyang usa ka mahinungdanon nga lakang sa pagpasayon sa mga imbestigasyon ug hustisya alang sa katawhan.
Samtang, si Governor Jubahib nagpanghimatuod sa padayon nga suporta sa probinsya alang sa kapulisan, ilabi na sa DNPFU. Gihisgutan niya nga plano sa administrasyon ang paghatag og dugang pondo alang sa mobile forensic services ug dugang suporta sa kampanya kontra droga.
“Gasto ko mismo ang napulo sa 20 ka K-9 dogs nga atong gamiton sa tibuok probinsya aron makapadayon ‘ta sa pagpakigbatok sa droga,” pasabot sa gobernador. Dugang pa niya nga ang probinsya mao’y mo-maintain sa supply ug logistics sa mga iro, samtang ang PNP ang magdumala sa ilang operasyon.
Ang pasilidad sa DNPFU gilangkoban sa chemistry division, firearms identification section, forensic photography section, ug medico-legal division — nga maghatag og mas paspas nga serbisyo alang sa mga imbestigasyon sa krimen.
Writer: Lorna Tripoli
