Gipahigayon sa Provincial Veterinary Office (PVO) sa Davao del Norte ang usa ka training alang sa Animal Health Care Management ug Disease Control niadtong Hulyo 17, taliwala sa alarming nga pagsaka sa kaso sa rabies sa probinsya, nga naglakip sa kamatayon sa usa ka 10-anyos nga batang lalaki sa Tagum City niaging tuig.
Base sa datos sa DOH-Davao Region, gikan sa tulo lang ka kaso niadtong 2023, nisaka sa 13 ka namatay tungod sa rabies ang natala sa Davao del Norte sa tuig 2024, — dunay 300% nga pagsaka. Sa tibuok Region XI, 36 ang natala nga namatay sa rabies niaging tuig, gikan sa 24 niadtong 2023.
“Even a single case of rabies or rabies case sa atoang probinsya, gitawag gyud na siya nga delikado na o alarming na. So giawhag mi ni Kuya Gov nga mag-igmat o i-intensify ang atoang pag-disseminate sa information or paghatag og proper management, proper care or seminar on pet responsible ownership, lalo na sa mga dogs and cats kay kini sila ang magiging reservoir or carrier sa maong rabies virus,” ingon ni OIC/PVO-Assistant Department Head Dennis Sumaoy, DVM.
Gidisenyo ang training aron masangkapan ang mga veterinary staff sa probinsya sa tukmang kahibalo sa pag-atiman ug paglikay sa mga sakit sa hayop sama sa rabies. Apil sa mga gitudlo mao ang vaccination protocols, proper care sa animal bite victims, ug ring vaccination strategy — diin bakunahan ang tanang hayop sa palibot sa identified ground zero sulod sa 500–1,000 metros.
Matod ni Dr. Benjamin Reyno, usa sa mga resource speakers, ang PVO nakadawat og rabies-positive samples gikan sa tulo ka local government units nga iyang gi-identify. Una na dinhi ang Tagum City labi na sa Brgy. Mankilam nga nipasa niadtong Enero, dayon ang Braulio E. Dujali partikularmente sa Brgy. New Casay, ug Brgy. Del Pilar sa New Corella sa wala pa ang Mayo niining tuiga.
“It was confirmed kay after nga gi-subject for laboratory test, nag-demonstrate nga ang brain o ang neuron sa iro nagpakita gyud nga naay presence of negri bodies which confirms that kana nga dog is infected with rabies virus,” sulti ni Reyno.
Gawas sa training, gilauman nga ang mga partisipante motabang sa barangay-level education drive — pag-awhag sa katawhan nga pabakunahan ang ilang mga hayop, dasigon ang responsible pet ownership, ug idangop dayon sa pinakaduol nga health care provider kung dunay mapaakan o makambrasan sa hayop.
Ingon ni Dr. Sumaoy nga ang mando ni Governor Edwin I. Jubahib mao ang pagsangkap sa tanang 223 ka barangays sa probinsya aron walay mabilin sa serbisyo.
“Sa atoang kabarangayan, ato ni siyang i-spread out sa atoang 223 barangays. Mao na siya ang mando sa atoang governor nga dili gyud, no barangays that will be left behind. So, tanang barangays iyahang gusto nga paserbisyohan gyud lalo na pag-abot sa rabies ug uban pang mga health services sa hayop,” matod niya.
Writer: Jun Rey Villanueva
