Baynte-singko (25) ka asosasyon sa Municipality of New Corella ang nakadawat og tag dyes-mil pesos atol sa Ceremonial Turn-over sa Livelihood Assisitance Grant ilawom sa Early Recovery Program sa probinsya, Hulyo 22.
Duha ka tao ang napiling makadawat og tag-lima ka libo ka pesos sa matag asosyayon. Sumatotal adunay singkwenta ka indibidwal ang identified beneficiaries sa maong ayuda.
Ang mga benepisyaryo giila mismo sa Provincial Social, Welfare and Development Office, kauban ang tabang sa Provincial Agriculturist’s Office, Municipal Agriculturist’s Office ug Municipal Social, Welfare and Development Office, isip mga mag-uuma nga naapektohan sa sagunsong pag-ulan ug pagbaha sa Davao del Norte sa niaging bulan sa Enero ug Pebrero.
Matud pa sa PSWDO, misugyot ang tagsa ka pundok og proyekto nga ilang sugdan pinaagi sa kapital nga isalig kanila. Pipila sa proposed project sa mga asosasyon ang pagtukod og sari-sari store ug bugasan. Human sa duha ka semana, gikan sa ilang pagdawat sa maong salapi, magpahigayon ang opisina sa PSWDO og house-to-house monitoring aron kumustahon ang kahimtang sa negosyo sa matag pundok.
Nagpaabot og mensahe si Governor Edwin Jubahib pinaagi kay Executive Assistant III Arnel Montero.
“Dako kaayo ang pasalamat ni Kuya Gov nga ang atoang New Corella nakadawat og livelihood cash assistance gikan sa province. Dili kaayo ing-ana ka daghan kay tungod pondo man gud ni sa probinsya. Pero pasalamat ta mga igsuon ko... Baynte-singko ka cooperative, tapos tag-duha per cooperative. Pero mga igsuon ko, sultian ta mo, kini ginagmay ra ni siya pero kinasingkasing ni gihatag ni Kuya Gov kay kabalo si Kuya Gov, kita tanan naperwisyo atong kalamidad,” sulti ni Montero.
Samtang, wala napakyas ang usa sa mga nakadawat gikan sa Brgy. Sto Nino nga magpasalamat.
“Sir, ma’am, salamat kaayo sa programa nga inyong gihatag sa amoa. Kinsa siya dako kaayo ni’g tabang sa amoang association. Wala pa gani ang kwarta pero naghunahuna na mi unsaon para mapalambo inyong gihatag sa amoa. Gamay lang kaayo siya, pero dako na kaayo siyang tabang para sa amoang tanan,” matud ni Cecil Dela Cerna, miyembro sa RIC Intensive Farmers Association.
Anaa sa maong event si PSWDO Head Rosalinda Rapista, Assistant PG Department Head Jeffrey Calamongay, MSWDO Head Odette Agad, Tagum City Councilor Dimitri Sator ug Ronald Eliot, kauban si Former Board Member Roger Laguna.
Writer: Caren De Vera
