Nipirma ang siyam (9) ka Provincial Scholarship recipients sa Memorandum of Agreement (MOA) kauban ang Davao del Norte Learning Institute (DNLI) ug ang Probinsyal nga Panggamhanan sa Davao del Norte. Ang pirmahanay gihimo Hulyo 23, 2025 sa Bulwagan ng Karunungan, Provincial Government Center, Mankilam, Tagum City.

Ang mga graduate student nga benepisyaryo sa programa ug nagatrabaho sa Provincial Capitol makadawat og 75% nga scholarship alang sa ilang master's program sa DNLI. Samtang ang mga nanarbaho sa laing mga ahensya makadawat og 37.5% nga scholarship.

Gisaysay sa usa ka Rhisel Pabriga, benepisyaryo sa scholarship nga dako kini’g tabang alang kanila. Iya usab gipasalamatan si Governor Edwin I. Jubahib ug ang nasampit nga tulunghaan nga maoy taytayan sa katumanan sa iyang gipangandoy nga mohuman sa master studies.

“This is truly an opportunity for me to do well and to do more in life and thanks be to God nga nakuha ko karon and thank you Honorable Edwin I. Jubahib sa opportunity and of course sa DNLI and DNSC program for this opportunity,” sulti ni Pabriga.

Ang nasampit nga iskolar pioneering sa programang gitanyag  sa DNSC ug DNLI nga mao ang Master in Public Affairs.

“Through this masteral, Master of Public Affairs, it can help me enhance my skills as well as my leadership and communication and leadership skills,” dugang niya.

Gipasabot ni DNLI Executive Director, PG Department Head Mervin Jay Suaybaguio nga ang DNLI andam sa pagtabang sa mga estudyante sa bisan unsang hagit sa ilang pagtuon.

“Kami, maningkamot gyud mi nga ang kalidad sa edukasyon and convenience para sa inyoha mahatag namo unta atong balosan og sakto pud nga commitment nga kung naa may problema duol sa amoa so that we can help you para atong masulbad nang mga problemaha ug dili ma-hamper ang inyong pag-eskwela sa atoang institute which is the DNLI,” matod ni Dr. Suaybaguio.

Mas gipalig-on ang determinasyon sa mga magtutungha sa suporta ni Governor Jubahib sa gitunol niining mensahe pinaagi sa iyang representante.

“Grabe gyud ang paningkamot nga makahatag og tabang sa tanan. Walay gipili, dili lang toa sa barangay ang hatagan niya’g suporta, kundili apil na pud ang ania diri sa kapitol kay family man ta diria karon. Family ta nga naghatag ug nag-uban sa paghatag og serbisyo sa katawhan. Nganong dili pud nato hatagan og suporta ang mga tao nga naghatag og tabang pud kang Kuya Gov ug sa atong mga katawhan,” ingon ni Executive Assistant IV Jemuel Melmida.

Ang maong kalihokan usa ka lakang sa probinsya aron palig-onon ang kapasidad sa human resources pinaagi sa edukasyon ug advanced training.

Writer: Lorna Tripoli
Photographer: Nelson Montero