Ang dakong pagmahal ni Governor Edwin “Kuya Gov” Jubahib sa katawhan maoy iyang inspirasyon sa paghatud sa mga nag-unang serbisyo sa Kapitolyo ngadto sa tugkaran sa mga barangay pinaagi sa Oplan KKK (Kaagapay sa Kalinaw ug Kalamboan).
“Asa ra gud mo ana nga ang governor mismo mokatkat sa bukid, moadto sa mga barangay kuyog ang mga department heads… tungod na sa among dakong pagmahal sa matag-usa kaninyo,” sulti sa gobernador, atol sa ika-walo nga hugna sa serbisyo caravan sa El Salvador, New Corella, Davao del Norte.
Liboan na pud ang nakapahimulos sa mga serbisyo sa mga lagyo ug hilit nga mga barangay sa Timberland District sa maong lungsod, lakip ang mga barangay sa Patrocenio, Del Monte, Sta. Fe, El Salvador, ug Mambing.
Ingon ni Kuya Gov nga gawas sa pagtunol sa mga serbisyo, tumong sab niya nga makita ang tinuod nga sitwasyon sa mga barangay ug makahimamat ang mga opisyales niini.
Gipasabot sa gobernador nga ang Oplan KKK sumpay sa iyang programa kanhi nga Oplang TABANG sa iyang unang termino pagkagobernador, agi’g paghatag solusyon sa dakong problema sa kasamok sa probinsya.
“Nakita nato sa atong pagbisita sa mga barangay nga ang tubag diay sa kagubot mao ang paghatag sa tinud-anay nga serbisyo… Kita na mismo ang niadto sa mga barangay para ipaabot ang serbisyo ug nakumbinsi nato ang katawhang (nahisalaag) nga mobalik sa poder sa gobyerno,” dugang niya.
Butyag sa gobernador nga tungod sa iyang pagbubo sa daghang mga serbisyo sa mga lagyong barangay, dunay mga 5,000 ka mga NPA ug miyembro sa Militia ng Bayan ang mi-surrender sa probinsiya, “tungod kay nabati na nila ang serbisyo sa gobyerno”.
Hinungdan kini nga nadeklara ang Davao del Norte isip “insurgency-free province”, nga miresulta sa mas daghan nga patigayon ug paspas nga paglambo sa probinsiya.
Mapasalamaton kaayo ang mga opisyales sa barangay sa dul-it ug tinud-anay nga serbisyo ni Kuya Gov sa ilang hilit nga dapit, sama ni kanhi Kapitan Reynaldo Amuncio sa Barangay Patrocenio.
“Kami nagapasalamat og dako… Dako jud ni og tabang sa kalinaw ug kalamboan sa barangay, kay kabawo mo nga kining lima ka mga barangay as timberland mao ni ang pinaka-critical sa una,” sulti sa opisyal.
Writer: Noel Baguio
