Gatosan ka mga empleyado sa Probinsyal nga Panggamhanan sa Davao del Norte ang gihatagan og pasidungog atol sa gipahigayong Gantimpla Agad Award, sa Bulwagan ng Karunungan, Government Center, Mankilam, Tagum City.
Sumala ni PHRMO Assistant PG Department Head Mila Laureno, nga dili lalim ang paghatud sa tinud-anay nga pagserbisyo sa katawhan, kinahanglan kining pasidunggan. Saysay ni Laureno nga dugang motibasyon sa mga empleyado ang paghatag sa maong pasidungog aron sa kanunay ipakita sa mga empleyado ang ilang talento ug katakos sa pagpanarbaho.
“The province has created, as per mandate sa CSC this recognition and awards because the province strongly believe that giving recognition and rewards play an important role to attract, retain valuable workforce or talents,” ingon ni Laureno.
Niduyog sa maong kalihokan si Provincial Administrator Engr. Josie Jean Rabanoz. Iyang gihatagan og dakong gibug-aton ang paghatag pasidungog sa mga empleyado. Sumala pa niya, nga bisan unsa ka gamay sa award nga mahatag basta ma-recognize lamang ang nahimong kontribusyon sa maong empleyado, bilihon kini alang kanila.
“Dako kaayo ang akong kalipay nga nagpadayon ‘ning atong gantimpala agad award. Maski kinsa lahi gyud ang feeling kung makadawat og award. Bisan unsa ka gamay nga recognition, basta ma-recognize ka, bisan gani walay token basta ma-recognize lang ang imong effort, dako na kaayo na sa imoha og meaning or reason for you to stay on, to continue doing kung unsa man ang imong dapat nga himuon,” sulti ni Rabanoz.
Gipasidunggan ang mga empleyado gumikan sa ilang talagsaong kontribusyon sa mga kalampusang naangkon sa probinysa sama sa pagkuha sa titulong finalist sa Most Businesss Friendly LGU (Province Level) C.Y. 2023, pagpahigayon sa Reproductive Health Forum partikular na sa HIV o human immunodeficiency virus, paspas nga pagtubag sa nakalabayng pagbaha, pagkab-ot sa Level 3 Standard of Accreditation sa Bahay Pag-asa, pagpanguna sa Turnover and Fund Transfer of Trichoderma, malampusong pag-implementar sa mga proyekto sa Provincial Veterinary Office nga nagpalambo sa kahimtang sa mga kahayopan, ug ang mga nipasar sa milabayng eksaminasyon sama sa Civil Service Exam, Licensure Examination for Teachers (LET), ug Basic Competency on Local Treasury Examination.
Ang paghatag sa Gantimpala Agad Award sa mga empleyado sa kapitolyo subay sa CSC Memorandum Circular No. 1 series of 2001, nga nagmando sa mga pangulo sa tanang buhatan sa gobyerno sa pag-implementar sa Program on Awards and Incentives for Service Excellence (PRAISE).
Writer: Nestor Mata, Jr.
