Gihatagan og dugang P3,000 pinansyal nga hinabang ang 55 ka mga kanhi rebelde sa Davao del Norte niadtong Agosto 20, 2024, atol sa usa ka seremonya sa VIP Clubhouse DNSTC, Mankilam, Tagum City. Ang maong hinabang gitunol ni Governor Edwin I. Jubahib kauban sa mga tinugyanan sa Department of Social Welfare and Development (DSWD), ug sa tabang sa kasundalohan ug kapulisan sa Davao del Norte Provincial Police Office (DNPPO). Kini alang sa batakang panginahanglan sa mga FRs (former rebels).
Kaniadto, gihatagan na usab sila og P20,000 ubos sa Enhanced Comprehensive Local Integration Program (E-CLIP) ug P65,000 gikan sa Department of the Interior and Local Government (DILG), isip tabang sa ilang pagbalik sa normal nga kinabuhi.
Sumala ni Gov Jubahib, kapin na sa 5,000 ka mga kanhi rebelde ang padayong gitabangan sa gobyerno pinaagi sa lain-laing mga programa sama sa pagpanginabuhi, pag-asikaso sa mga kaso nga ilang giatubang, ug ang plano nga housing program.
"Tagaan nato’g suporta para mapakita gyud sa inyoha nga ang gobyerno seryoso, seryosong nitabang sa inyoha.Ug gusto pud nako ipahibalo sa inyoha nga dili ang pag-NPA maoy solusyon sa inyong problema, kundili ang tabang sa individuals. Matag usa ninyo gapaningkamot og tabang sa gobyerno, mao nang solusyon sa inyong problema ug moasenso ang inyong matag pamilya," matud sa gobernador.
Samtang duha ka mga FRs ang nipadayag sa ilang pasalamat ug gisaysay ang kaayohan nga ilang nadawat.
"Labi na gyud kang Kuya nga naghatag gyud kaayo sa amoa og kaayohan, nga kini gyud akoang sari-sari store nagsugod gyud ni sa P20,000. Ang amo gyud pagdawat pirmero, akong gihinay-hinay, akong ginegosyo hangtod siya miabot sa 2024 ug nadungagan na pud mi sa P65,000. Ang idea na pud nako sa P65k, gidagdag na pud nako sa negosyo nako nga kantidad P20k. Kaluoy sa Ginoo karon na gyud akong kapital tanan og P100k. Walay labot sa kwarta sa akong mga anak nga ako pud gipaporsientohan," sumala ni Alyas Tina.
"Ang gidaganan sa cash assistance nako kadtong sa Eclip is, nagpalit ko og yuta one hectare for farming. Gihinay-hinay nako kay wala man koy knowledge about sa farm. So, nagpatabang ko sa akong bayaw unsaon pagpadagan. So, ang kwarta akong gipalihok. Then, nagpa-assist ko sa akong mga bayaw. Thankful kaayo ko kay every four months, naa na koy paaboton kay naa na koy mais gikan gihapon sa Eclip," matud ni Alyas Uma.
Ang maong dugang hinabang kabahin sa padayong paningkamot sa probinsya nga mahatagan og kinabuhi ang mga kanhi rebelde ug mapakita ang suporta sa panggamhanan aron batokan ang insurhensiya ug aron sa paglambo sa komunidad.
Writer: Lorna Tripoli
