Dili matukib ang kalipay sa mga tribung Dibabawon tungod sa 75 ka libreng pabalay, kon Balai Kabauyan Tu Dibabawon, nga gidalit kanila sa gobyerno sa Sitio Lunao, Sto. Niño, New Corella, Davao del Norte.
Pormal nang gi-turnover ni National Housing Authority (NHA) – XI Regional Manager Engr. Clemente Dayot ang maong proyekto kang Governor Edwin "Kuya Gov" Jubahib, kinsa nihatag sab sa simbolikong susi ngadto sa mga tribal leaders, atol sa inagurasyon sa proyekto niadtong Oktubre 30, 2024.
Ang pondo alang sa disenteng mga balay nga gikan sa NHA giparesan og counterpart sa Probinsyal nga Panggamhanan sa Davao del Norte og kantidad ₱12.8 million, alang sa pagtukod sa mga rainwater collectors ug solar lights matag balay, slope protection, canal lining, kalsada, ug ground development.
Sulti ni Dayot nga padulong na sab ang pondo alang sa dugang nga 25 ka mga balay, sanglit 100 ka mga balay ang aprubado sa maong proyekto.
Subling gibatbat ni Kuya Gov ang iyang paghatag prayoridad sa mga IPs tungod kay nabiyaan sila sa lakat sa kalamboan sanglit dugay silang napasagdan.
“Kamo ang naa sa pinakaubos. Busa, kamo ang dapat hatagan og dakong pagtagad para usab nga makapantay mo sa atong mga kaigsoonan nga naa namuyo sa mga kalungsoran ug siyudad,” ingon sa gobernador.
Gipasalig niya nga ang housing program sa probinsya dili lang para sa mga IPs kondili apil sab ang mga squatters nga hangtud karon wala pay eksaktong panimalay nga anaa nagpuyo daplin sa kasapaan ug mga kabaybayonan.
“Mao na ang atong ginalantaw nga ang tanan dinhi sa atong probinsya sa Davao del Norte walay mapabayaan natong mga kaigsoonan,” ingon ni Kuya Gov.
Butyag sa gobernador nga iyang isunod nga proyekto sa komunidad ang covered court, health center, day care center, ug uban pa.
Nahatagan na sab og livelihood trainings ang mga tribu aron sa ilang panginabuhian.
Mapasalamaton si Datu Lito Omos sa maong proyekto nga kanhi damgo lamang alang kanila ug karon natuman na gyud tungod sa dakong kasingkasing ni Kuya Gov sa mga IPs.
Writer: Noel Baguio
