Gibandera ni Provincial Administrator Engr. Josie Jean Rabanoz ang dakong kalampusan sa Oplan KKK (Kaagapay sa Kalinaw ug Kalamboan) serbisyo caravan sa Tagum City, nga nihatud sa daghang mga serbisyo sa mga Tagumenyo.
“Dako gyud ang paghigugma ni Kuya Gov sa katawhan. Mao nga iyang gipadayon kini nga programa,” sulti ni Rabanoz, kinsa nirepresentar sa gobernador, sa ika-unom nga hugna sa maong programa nga gipahigayon sa Barangay Magugpo South, Tagum City.
Butyag niya nga pagbalik ni Kuya Gov gikan sa 90-day suspension, giplastar niya dayon ang pagpahigayon sa Oplan KKK ug giuna gyud niya ang Siyudad sa Tagum pinaagi sa pag-cluster sa 23 ka mga barangay niini.
Si Board Member Nicandro Suaybaguio, Jr. nakadayeg kay bisan pa man sa mga hagit nga iyang giatubang, padayon nga mibarog ang gobernador para masulbad ang dugay nang mga problema sa probinsya.
“101 percent ang suporta nga akong ihatag. Dili lang tungod kay pareho mi’g kolor sa politika kundili sa nakita nako nga ang paglaom sa leadership ni Kuya Gov Edwin Jubahib ang kinahanglan sa probinsya sa Davao del Norte,” sulti sa opisyal.
Sa pagnaog na pud sa mga opisina sa kapitolyo niadtong Agosto 9, 2024, gihatagan og dakong pagtagad ang mga panginahanglan sa katawhan sa mga clustered barangays sa Magugpo South, Magugpo West, Magugpo North, ug Magugpo Poblacion.
Gidagsa sa mga residente ang mga nag-unang mga serbisyo, sama sa libreng medical and dental services, social services, tambag legal, eye screening, x-ray, agriculture and veterinary services, livelihood training, ug daghan pang uban.
Saysay ni Rabanoz nga kini nitimaan usab sa pagtapos sa pagtuyok sa maong serbisyo caravan sa siyudad human maserbisyohohan ang tanang mga barangay niini ug andam na kining mobalhin sa ubang nga munisipyo hangtud malukop ang tibuok probinsya.
Gipasalamatan niya ang pagduyog ug paghatag serbisyo sa ubang mga ahensiya, sama sa DTI, DOLE, TESDA, NCIP, PNP, ug uban pa.
Uban usab sa maong programa sila Alvarez Foundation Inc. Founding Chairperson Jen Maliwanag, Board Member Francisco Remitar, Vice Mayor Allan Rellon, mga provincial department heads, ug uban pang mga local officials. #
Writer: Noel Baguio
