Personal nga gitunol ni Governor Edwin “Kuya Gov” Jubahib ang libreng abono alang sa liboan ka mga mag-uuma atol sa gipahigayong Kaagapay sa Pagbangon sa Kalamidad, Mass Distribution of Fertilizers ilawom sa Department of Agriculture’s Quick Response Team katambayayong ang Probinsyal nga Panggamhanan sa Davao del Norte, niadtong Agosto 2, 2024 sa DavNor Coliseum, DNSTC, Mankilam, Tagum City.
Gikalipay ni Governor Jubahib ang mokabat 8 mil ka sakong abono nga gihatag sa Department of Agriculture alang sa mga mag-uumang biktima sa milabayng pagbaha ug hulaw nga nasinatian sa probinsya.
“Kining inyohang fertilizer karon, mao ning tubag sa atong quick response, para sa mga damage ninyo panahon adtong shearline ug trough of LPA nga nahitabong dakong pagbaha kanato sa Davao del Norte,” matud ni Kuya Gov.
Gihangyo ni Kuya Gov ang mga katawhan nga itugot ang paggamit sa ilang mga utlanan sa yuta aron makabuhat og dagkong kanal nga makatabang sa pagpahunong sa pagbaha gikan sa kabukiran.
“Mohangyo ko sa inyoha kay kahibalo ko naa man mo’y mga yuta. Kung mosugot mo nga sa mga boundary sa inyong mga yuta tanan atong himoan og dagkong kanal,” dugang sa gobernador.
Gianunsyo ni Kuya Gov nga giaprobahan sa kongreso ang balaodnon nga nagpalapad sa coverage area sa Davao Light and Power Company, Inc., diin kalakip sa maserbisyohan ang tanang kalungsoran sa Distrito Uno sa probinsya ug Munisipalidad sa Maco sa Davao de Oro.
Nitambong sab sa maong kalihokan sila si Department of Agriculture Regional Field Office XI Executive Director Macario D. Gonzaga, PAGRO Acting PG-Department Head Engr. Raymund A. Cogay, Councillor Jan Dmitri Sator, Councillor Ronald Eliot ug Board Member Nicandro “Nickel” Suaybaguio, Jr.
Writer: Nestor Mata, Jr.
