Gipahigayon ang usa ka espesyal nga seremonya sa Philippine Red Cross (PRC) Davao del Norte Chapter, diin gipasidunggan ang lima ka retiradong mga empleyado pinaagi sa paghatag og plaque of recognition sa ilang mga katuigang pagpanarbaho. Ang seremonya gipahigayon sa buhatan sa PRC, Government Center, Mankilam, Tagum City, Septyembre 5, 2024.
Ang mga gipasidunggang retirado mao sila si Teresita R. Machete (27 ka tuig), Virginia Vitor (32 ka tuig), Nemesio Gesoro (29 ka tuig), Teresita Himbing (25 ka tuig), ug Luzviminda C. Neri (37 ka tuig).
Gipangunahan ni Chapter Chairman Dr. Joseph Nilo Parreñas ang paghatag sa plaque of recognition ngadto sa mga retirado isip pasalamat sa ilang dedikasyon ug pagpangalagad.
Nipaambit si Artemio Claridad IV, CSR-SS/DMS, og espesyal nga mensahe alang sa mga retirado. Iyang gihatagan og dakong gibug-aton ang dedikasyon ug commitment nga ilang gipakita isip pagtuman sa ilang nga gipanumpaang trabaho.
“As you step into this new chapter of your life, may it be filled with relaxation, joy and absolutely no paper work. Enjoy the freedom from those midnight calls and spontaneous meetings. We hope you spend your days doing what you love, whether that’s travelling, gardening, or just savoring the bliss of a well-earned nap. Thank you for your years of dedicated service,” sumala ni Claridad.
Gipadayag ni Teresita R. Machete ang iyang kinasingkasing nga pagpasalamat ug ang iyang dakong kalipay sa tanan nga nagasuporta kaniya sulod sa daghang katuigan sa serbisyo.
“So, wala na koy laing masulti. So, salamat kaayo sa akong mga kauban nga naghatag aning activities nga successful. So, again thank you. Thank you so much,” sulti ni Machete.
Ang maong seremonya usa ka pagpadayag sa pag-ila ug pasidungog sa mga retirado sa ilang bililhon nga kontribusyon ngadto sa PRC, nga nagpadayon sa ilang misyon sa pagtabang ug pagserbisyo sa komunidad.
Ang Philippine Red Cross usa ka humanitarian nga organisasyon nga naglihok sa Pilipinas isip kabahin sa International Red Cross ug Red Crescent Movement. Gitukod kini niadtong 1947 ug giila nga nag-unang organisasyon sa paghatag tabang panahon sa emerhensiya, kalamidad, giyera, boluntaryong pagdonar og dugo, ug paghatag serbisyong panglawas dinhi sa nasud.
Writer: Nestor Mata, Jr.
