Gipahigayon ang unang hugna sa oryentasyon bahin sa tuberculosis alang sa mga kawani sa kapitolyo sa Provincial Information, Communication, and Knowledge Management Office (PICKMO) ug Provincial Planning and Development Office (PPDO). Ang kalihokan, nga gipangunahan ni Dr. Dominic Basalo sa Provincial Health Office (PHO), nagtumong sa pagpahibalo sa mga empleyado bahin sa paglikay ug pagtambal sa maong sakit.

Kini nga aktibidad kabahin sa Health and Wellness Program ni Governor Edwin I. Jubahib aron masiguro ang kahimsog sa mga kawani sa kapitolyo. Giingnan ni Dr. Basalo ang mga empleyado nga ang TB dali ra mokaylap pinaagi sa hangin ug importante ang regular nga check-up. Giawhag usab niya ang mga nataptan sa sakit nga mopailalom sa "Tutok Gamotan Program," usa ka libreng programa sa pagtambal sa TB.

Si Dr. Mervin Jay Z. Suaybaguio, PICKMO Head, mipadayag sa iyang suporta sa kampanya, nagkanayon nga mahinungdanon ang kahibalo sa TB aron malikayan ang pagkatap niini. "Kung naa man sa atoa simbako lang makakuha anang sakita, anaa ang provincial government always there to help us para maayo ta… But, so far walay nagkarecord nga tuberculosis sa PICKMO," ingon niya.

Susamang oryentasyon pagahimoon usab sa ubang departamento sa kapitolyo sa sunod iskedyul aron maprotektahan ang panglawas sa mga empleyado ug ilang pamilya.

Ang tuberculosis, nga kasagarang mailhan pinaagi sa ubo nga molungtad og duha ka semana o labaw pa, kinahanglan atubangon dayon aron malikayan ang komplikasyon ug pagtakod. Pinaagi sa hapsay nga impormasyon ug suporta sa gobyerno, mas mapalig-on ang kahimsog sa probinsya.

Writer: Lorna Tripoli