Dili lang kahanas sa paglangoy, pagbugsay, ug pagluwas ang gisukod apan apil usab ang abilidad sa pagtinabangay sa duha-ka-adlaw nga Open-Water Search and Rescue (OWSAR) Skills Demonstration nga gipahigayon sa Provincial Disaster Risk Reduction and Management Office (PDRRMO) niadtong Hulyo 24–25 sa Ponds Beach Resort, Tagnanan, Mabini, Dacao de Oro.
Gikan sa 10 ka lokal nga DRRMO sa probinsya, gigrupo sa unom ka composite teams ang mga partisipante aron palig-onon ang koordinasyon ug camaraderie tali sa mga rescuers—usa ka estratehiya nga gituyo aron malikayan ang kompetisyon nga mahimong personal ug aron masentro ang tumong sa tinuod nga teamwork.
Sama sa konsepto sa “Amazing Race,” ang mga teams mo-perform sa unom ka stations nga naglangkob sa high-pressure rescue challenges. Sa Station 1 – Map navigation, finding the azimuth, ug compass reading. Sa Station 2 – ilang i-assemble, paburoton, ug pahiyoson ang rubber boat, ug ang ensaktong pag-safety carry niini. Sa Station 3 – ang underwater knot-tying. Kini ang usa sa pinakalisud sa mga challenges kay hangtud 15 ft ang gilawmon nga ilang salomon. Station 4 – dinhi tan-awn ang ilang kahanas sa saktong pagbugsay o pag-paddle sakay sa rubber boat. Tudloan usab sila kung unsaon pagpahayang sa rubber boat kung kini matuwad.
Sa Station 5 – Tudloan sila kung unsaon pag-operate sa rubber boat nga de makina. Medyo kritikal pud ni nga lebel sanglit luwason nila ang tulo ka biktima nga anaa sa open water, duha niini concious, samtang ang usa semi-conscious hangtud nga makuyapan. Ang last nga station, Station 6 –human nila makuha ang tulo ka biktima, naay mosugat nga medical team nila sa baybayon, dayon mo-perform sila’g Basic Life Support samtang gahulat sa rescue team nga ilang gitawag.
Matod ni Operations and Warning Division Head In-Charge Eric R. Rosillo, Local DRRM Officer IV, tumong sa maong kalihokan ang pag-standardize sa open-water rescue operations sa tanang LGUs sa Davao del Norte.
“Klase-klase, lain-lain nga interpretation sa pag-conduct og open water search and rescue. Simply because lain-lain pud sila og mga naghatag og mga trainings sa ila, lain-lain pud nga mga agencies. So, for this activity, since atong province trained man sa Philippine Coast Guard, gi-adopt nato ang standard sa open water search and rescue, the context sa PCG. Mao nang karon, nakita nato nga every step nga gihimo nila naa tay standard nga gina-follow. So, mao na ang main intention nato, ma-standardize ang rescue operation,” sulti ni Rosillo.
Gipunting usab sa PDRRMO nga kritikal kini alang sa probinsya nga adunay 24 ka coastal barangays ug kasinatian sa daghang maritime incidents.
“Nakita pud nato ang kakulangan ug gap sa mga local government units especially sa mga coastal LGUs nga dili haum, dili standard ang ilang mga skills. Mao nang nigawas ni siya nga demonstration,” ingon ni Rosillo.
Bisan adunay kompetisyon, gihimug-atan ni PDRRMO Head Glenda O. Delideli, kinsa personal nga nitambong sa kalihokan bisan pa sa dili maayong gibati sa lawas, nga ang kalihokan usa ka training platform nga nagpalig-on sa relasyon sa mga responders.
“Ang amoang gusto pud sa province, ang support pud ni Kuya Gov is naa dinhi. Ang support ni Kuya Gov makit-an pud sa tanang team kay gawas sa competition siya, pag-enhance pud ni sa skills sa matag usa. Dili pud gusto nato sa province nga magkita lang ang mga responders panahon nga naay disaster, naay respondihon. So, dapat mag-ilhanay sila bisa’g naa sa normal ug naa sa peace time,” matod ni Delideli.
Sa pagpahigayon sa maong challenge, gipatuman ang taas nga safety protocol sa tanang stations, lakip na ang medical teams on standby sa baybayon ug sa dagat, mga rescue vehicles, ug kompleto nga life-saving equipment aron masiguro nga luwas ang mga partisipante.
Writer: Jun Rey VillanuevaPhotos: PDRRMO
