Aron maprotektahan ang Davao del Norte batok sa hulga sa mga sakit sa kahayopan ug agrikultura, gipalig-on sa Provincial Veterinary Office (PVO) ang operasyon sa Provincial Border Control Quarantine Checkpoints. Kini nga mga checkpoint nagmonitor ug nag-regulate sa paggawas ug pagsulod sa mga produkto sa agrikultura ug kahayopan aron masiguro nga luwas ug dunay saktong dokumento.

Matud ni Glenn Sitoy, team leader sa checkpoint sa J.P. Laurel, Panabo City, lakip sa ilang tahas ang hugot nga inspeksyon sa mga sakyanang nagdala og hayop ug karne. “Ang among ginatan-aw dinhi ang ilang papeles sama sa NMIS (National Meat Inspection Service) permit, Veterinary Health Certificate, ug shipping permit. Kinahanglan usab nga rehistrado ang ilang truck sa Bureau of Animal Industry,” pahayag niya.

Gipasabot ni Senior Agriculturist Dr. Minelo Generale nga ang border control dako’g papel sa pagpugong sa makatakod nga sakit sama sa African Swine Fever (ASF). “Mando sa atong Hon. Governor nga pakusgan ang pagbantay, ilabi na sa mga national highways, aron masiguro nga limpyo ug luwas ang mga produktong mosulod ug mogawas sa probinsya,” maoy iyang ingon.

Ubos sa pagdumala ni OIC Department Head Dr. Dennis Sumaoy ug sa kamandoan ni Governor Edwin “Kuya Gov” Jubahib, padayon ang paningkamot sa PVO sa pagpahugot sa ilang mga estratehiya aron maprotektahan ang ekonomiya sa probinsya ug masiguro ang kahimsog sa mga produkto nga mogawas ug mosulod niini. Gidasig sab ang kooperasyon sa mga negosyante, mag-uuma, ug transporters aron masiguro ang hapsay nga pagpatuman sa mga lagda sa biosecurity ug quarantine measures.

Panghimangno niya sa publiko nga mosuporta sa mga inisyatiba sa gobyerno pinaagi sa pagsunod sa mga mando sa quarantine checkpoints ug pagpahibalo sa awtoridad kung adunay kadudahang aktibidad nga makadaut sa agrikultura ug ekonomiya sa probinsya.

Writer: Nestor Mata, Jr.