Nagsugod lang sa 105 ka manok niadtong 2022, apan karon, adunay na silay bugasan nga nakahatag og mas lig-on nga panginabuhian sa ilang mga benepisyaryo.
Ang Libertad KAAGAPAY Association usa lamang sa mga benepisyaryo sa KAAGAPAY Program (Kawsa sa Agrikultura ug Panginabuhian sa Barangay), usa ka inisyatiba sa administrasyon ni Governor Edwin I. Jubahib nga nagtinguha sa seguridad sa pagkaon ug panginabuhian sa mga katawhan.
Gihatagan sila og libreng piso ug pagkaon sulod sa 45 ka adlaw, ug sa ilang unang cycle sa pagbuhi, nakahalin sila’g ₱24,000. Sa sunod nga mga cycle, misaka pa ang ilang kita hangtod nga nakaabot sa puntong aduna na sila’y kapital nga naghatag kanila og bag-ong oportunidad.
Sumala ni Deviciano Moca Jr., presidente sa asosasyon, tungod sa ilang kakugi ug disiplina sa pagdumala sa ilang kita, nakapasa sila sa mga rekesitos sa Sustainable Livelihood Program (SLP) sa KAAGAPAY, nga usa ka dugang nga tabang alang sa ilang grupo.
Ang ilang kinita gikan sa free-range chicken ilang napadako. Tungod niini, nakuha nila ang ₱360,000 nga budget gikan sa SLP, nga ila pung gigamit sa pagpatukod sa ilang Bigasan Libertad. Opisyal nga naablihan ang ilang bugasan niadtong Abril 11 sa niaging tuig.
“Okay man (sir) sa pagkakaron kay gani ang amoang kwarta gani niabot na og ₱200,000 naa na amoang bangko karon. Naa pay cash on hand sa amoang treasurer, niingon among treasurer nga dili banggiton unsa kadako kay basin siya holdup-on, pero sa pagkatinuod lang naa gyud mga more or less ₱80,000. Naa pa mi collectible ug naa pa pud mi unsold nga naa pa sa amoang stock,” iyang gibutyag.
Alang kang Moca, dakong hagit ang ilang giagian, apan tungod sa KAAGAPAY, naablihan ang daghang oportunidad alang kanila. “Salamat kaayo Kuya Gov sa imohang programang KAAGAPAY, medyo na-touch ko ah. Na-touch ko kay kung wala imong programa medyo lisud gyud mi, lisud gyud. Karon sa amoang kalisud, nasalbar kay makautang mi, utang-bayad, bayad-utang,” ingon niya.
Sa iyang pasalamat kang Governor Jubahib, naglaum siya nga daghan pa ang matabangan sa programa. “Gov, kung mahimo lang unta ang Diyos magauban kanimo kanunay aron daghan pay matabangan nimo sa probinsya sa Davao del Norte. Saludo kaayo ko nimo gov. Mabuhay ka,” sulti ni Moca.
Gikan sa pipila ka manok, nahimong usa ka malungtaron nga panginabuhian ang ilang negosyo. Ang KAAGAPAY Program nagpabiling usa ka kasaligan nga taytayan sa pagpalig-on sa panginabuhian sa mga katawhang Dabaonon.
Writer: Lorna Tripoli
