Dakong ginhawa ug paghupay ang natagamtam sa mga residente sa Tagum City sa klase-klaseng panglawas ug katilingbanong serbisyo kanila sa Oplan Kaagapay sa Kalinaw ug Kalamboan (KKK), nga dalit ni Gobernador Edwin “Kuya Gov” Jubahib.
Sa pagsugod sa Oplan KKK sa siyudad niaging semana, nagkadaiyang panginahanglan ang nasulbad ug tabang ang nadawat sa mga residente. Usa na dinhi si Daniel Montero, lumolupyo sa Brgy. Mankilam, nga nagpacheck-up sa iyang allergy nga 22 ka tuig na niyang ginaantos.
“Nianhi ko diri kay nagpacheck-up ko sa katol-katol sa akong ilong… Allergy ba. Taod-taod na pud ni, mga edad ko 25 ‘nya karon kay 47 (anyos) naman ko. ‘Pag kadlawon, mag-aching aching ko, ‘nya ‘pag makasimhot og abog, perfume, kanang mga strong (nga baho),” ingon ni Montero.
Ang iyang asawa, gipahimuslan usab ang libre nga Product Packaging & Labeling Seminar nga gidalit sa PLGU-DavNor katambayayong ang Department of Trade and Industry.
“Akong asawa pud, gusto man siya mag-business unya wa man siya’y idea sa rebranding. Kung mangompra siya’g product ug unsaon pag-rebrand, wa siya kabalo, maong gusto siya mo-seminar… Dako kaayo ni’g tabang oy kay ang mga wala nato mahibal-an, mahibal-an… So, mas advantage kay dinhi, wala na’y bayad maong amo na lang gipahimuslan kay sayang man pud… Daghan kaayong salamat kang Kuya Gov. Saludo mi sa imoha… Dako kaayo ni siya nga tabang dili lang sa amoa pero sa uban pud, sa mga pobre jud intawon nga di makapa-check up og mahal, ug uban pa aning mga free niya nga gipanghatag,” dugang ni Montero.
Gidala usab ni Jocelyn Tapic, taga-Brgy. La Filipina, ang iyang apo, nga nag-antos sa kalibanga ug kalintora. Gigamit usab ni niya nga higayon aron maka-avail sa libre nga pagpaibot og ngipon.
“Akong apo kay ako pud gipacheck-up kay basa ang tae ba nya bag-o ra ni naulian sa kalintora. Ako pud… kay okasyon na ba nga naay libre, kay mahal baya kaayo magpacheck-up ron no… check-up sa panglawas ug paibot sa ngipon… Dako na kaayo ni’g tabang sa amoa gyud kay sa pagkakaron, lisud gyud ang panahon. ‘Nya magsakit ta, [maayo] man ni kay libre man… Kang Kuya Gov Edwin Jubahib, daghan kaayong salamat sa imong mga programa nga imong gihatag diri sa katawhan,” sulti ni Tapic.
Samtang, gisulti ni Rollo Gomez, usa ka mag-uuma gikan sa Brgy. San Agustin, nga gawas sa mga panglawas nga serbisyo, nakadawat usab siya og mga libre nga semilya sa mais gikan sa Probinsyal nga Panggamhanan. Dugang ni Gomez, nangdagko na ang iyang mga gipangtanom nga nangka gikan sa semilya nga nadawat niya sa niagi nga Oplan Serbisyo sa Kalinaw.
“Naglinya ko diri para makapacheck-up ko sa akong lawas… Gitagaan pud ko diri og libre nga [semilya] sa mais… Gitagaan ko nila og pantanomay, kay ang ilang gihatag sa akoa nga nangka, nidako naman pud… Maong Gov, salamat aning imong gihatag sa amoa para makatanom mi og mga gulay, mga mais,” matud ni Gomez.
Gawas sa mga nahisgotan nga serbisyo, gitanyag usab sa Oplan KKK ang libre nga tambag legal, libreng gupit, eye screening service, HIV testing and counseling, ug uban pa. Mitunol usab kini og libreng tsinelas, lugaw, ug family food packs.
Ang Oplan KKK nagtumong nga mahatag ug matubag ang mga nag-unang panginahanglan sa katawhan. Magpadayon og libot ang Oplan KKK sa uban pang mga barangay sa Tagum City sa mga mosunod nga semana.
Writer: Hannah Zafra
