Usa ka grupo sa mga misyonaryong basketbolista nga nakabase sa Estados Unidos ang nagdumala og duha ka adlaw nga basketball clinic sa DavNor Gym niadtong Hulyo 7 ug 8, nga naghiusa sa taas nga lebel sa coaching ug mga mensahe sa pagtoo.
Gipangulohan kini ni Coach David Corsi, ang founder sa Philippine Bearcats Elite, ug gilangkoban sa kanhing mga NBA players nga sila Phillip Morrison ug Trey Lewis. Ang maong klinika, nga gitawag og ‘The Origins Basketball’, labaw pa sa ordinaryong skills camp kay kini nagtumong usab sa espiritwal nga pagtubo ug panaghiusa, pinaagi sa paggamit sa basketball isip usa ka himan sa pagpalig-on sa pagtoo ug pakig-uban sa isigkatawo.
Gisaysay ni Coach David Corsi nga nagpakita kaniya sa iyang damgo si Jesus ug nihatag kaniya’g mensahe.
“Sepsis is a decease that I’ve got in biopsy and I've almost died. And when I was in hospital, the only time in my life, Jesus came to me in my dream and said, “I want you to go in the Philippines... to train, mentor and share the love of Jesus to the youth in the Philippines,” saysay ni Corsi.
Gisugdan niya ang misyon sa nasud kauban ang mga kanhi NBA players sa pagtudlo sa mga kabataang Pinoy sa mga teknik sa ball-handling, teamwork, ug disiplina samtang, bitbit ang mensahe sa maayong balita sa kaluwasan.
“We also work a lot of kids here in Tagum and Davao City, training them, developing them, and do well in high school and college so they can go in good education.... It’s Jeremiah 29:11, ‘For I know the plans I have for you, declares the Lord, plans for welfare and not for evil, to give you a future and a hope’. That's my verse [for] every one of the kids we coach that God is in control and God wants them to succeed, do well, and have an abundant life,” dugang niya.
Gipaambit usab ni Coach Corsi ang usa ka mensahe alang sa buot mamahimong malampusong basketbolista.
“You can't just sit at home, on your phone watching TV and expect to be a great basketball player. You have to have passion. You gonna have a discipline and you gonna understand the sacrifice that you have to make to be great,” padasig ni Corsi.
Ang kalihokan kabahin sa youth program sa probinsya nga “Kalaro Kita, Hindi Kalaban”, nga gisuportahan ni Governor Edwin Jubahib ug gipasiugdahan sa Provincial Sports, Youth and Development Office (PSYDO) sa pagdumala ni Giovanni Gulanes.
“Nagbitbit pud sila og mga di basta-basta nga basketbolista, kanhi mga NBA, aron tudloan gyud labi na ron ang basketball makita nato puros sumbagay. Karon, ilang ipakita nga ang sports diay maoy hinungdan nga mag-amigohay ta, maoy pagpaugnat sa kusog. Ang sports diay hinungdan nga aduna ta’y disiplina. Haom gyud na sa programa ni Kuya Gov Edwin Jubahib nga gamiton nato ang sports para sa development sa mga bata,” sulti ni Gulanes.
Ang mga medical personnel gikan sa Provincial Health Office ug mga kawani sa PSYDO nagsiguro nga luwas ug epektibo ang tibuok kalihokan.
Writer: Lorna TripoliPhotographer: Andrew John Hababag
