Gidasig ni Governor Edwin "Kuya Gov" Jubahib ang 230 ka magtutungha nga benepisyaryo sa Special Program for Employment of Students (SPES) atol sa Grand SPEStahan Day niadtong Hulyo 23, 2024 sa DavNor Gym, DNSTC, Mankilam, Tagum City.
Mipasalig ang gobernador nga lig-onon niya ang pag-agni og mga mamuhunan sa probinsya aron mapakusog ang ekonomiya ug makamugna’g daghang panarbaho. Sulti niya nga magpadayon ang iyang administrasyon sa tinguha nga mapabilin ang kahapsay ug kalinaw sa probinsya nga labing rekisitos sa paglambo.
Gidasig sab niya ang mga SPES grantees nga mohuman gayud sa ilang pagtungha aron makab-ot ang ilang mga pangandoy sa kinabuhi.
Nidawat og inadlaw nga P590 ang mga SPES grantees alang sa 20 diyas nga pagpanarbaho sa nagkadaiyang departamento sa kapitolyo, pinondohan sa Department of Labor and Employment ug gisuportahan sa Probinsyal nga Panggamhanan sa Davao del Norte.
Ang kalihokan gidumalahan sa Public Employment Services Office (PESO) nga naglakip sa panagtigi sa Zumbanatics, Larong Lahi, Creative Jeans Presentation, Career Attire Presentation ug Trashion Attire diin cash prizes ang nadawat sa mga mananaug. Ang SPES grantees gikan sa LGU Kapalong maoy palarang nakoronahan isip Mr. and Ms. SPES 2024.
Writer: Lorna Tripoli
