Nagpahigayon og oryentasyon ang Land Transportation Franchising and Regulatory Board XI (LTFRB XI) alang sa pag-update ug pagporma sa Local Public Transport Route Plan (LPTRP) sa Probinsya sa Davao del Norte, niadtong Hulyo 9 sa Bulwagan ng Karunungan Hall, Capitol Compound, Tagum City.

Gitambongan kini sa Technical Working Group sa probinsya, pinangulohan ni Acting PPDC Engr. Maria Hazel Zafra, ug mga representante gikan sa onse ka mga siyudad ug munisipyo.

Ang LPTRP usa ka detalyadong plano sa ruta nga naglatid sa piho nga mga paagi sa transportasyon ug ang gidaghanon sa mga yunit nga gikinahanglan alang sa paghatod og land transport service. Usa ka mahinungdanong lakang ang maong oryentasyon aron mas mapaayo og mapalig-on ang serbisyo sa mga public transport services sa probinsya ug para masiguro ang pagsunod sa mga sumbanan sa regulasyon.

Gipunting sa mga resource speakers gikan sa LTFRB XI ang importansya sa pakigtambayayong sa mga local government units (LGUs) ug Transport Service Entities (TSEs) aron matino ang gidaghanon sa mga modernized vehicles nga idugang sa matag lugar ug aron malikayan ang pag-overlap sa mga ruta niini.

Ang oryentasyon nagsilbi usab nga plataporma alang sa mga hingtungdan aron mapagawas ang ilang mga pangutana ug kabalaka. Gipasabot dinhi ang importansya sa paghimo og komprehensibo ug epektibo nga route plan nga nahiuyon sa panginahanglan sa komunidad, aron masiguro ang usa ka luwas ug episyenteng transport network.

Ang LPTRP magsilbi usab nga potential indicator sa matag LGU alang sa Seal of Good Local Governance sa CY 2025, diin gilauman nga magpalambo sa kalidad sa kinabuhi sa katawhan sa Davao del Norte.

Writer: Hannah Zafra